Shillong, Naitung 17:Mynta ka sngi ka Hima Nongkhlaw ka la pynlong ia ki jingialehkai sports bapher bapher kum shibynta ban kynmaw burom ia u Tirot Sing Syiem ia ka sngi iap ba 179 snem ha madan Mairang bad kumjuh ruh la pynlong ia ka jingialang ban kynmaw burom ia une u Khlawait ka Ri uba la pha la ka jingim na bynta ban iada ia ka ri bad ka jaidbynriew ha Nongkhlaw.
Ha kane ka prokram la wan ban iashim bynta da ki heh sorkar, u Pa’iem PN Syiem, ki myntri, ki rangbah, ki longkmie, ki samla bad ki kynnnah skul kiba la iashim bynta ha ka jingialehkai ruh sports kaba kynthup ia ka rongbiria siat khnam, ka kynjat bol, Volleyball
Kaba sngewtynnad shuh shuh ka long ha kane ka sngi, ka Synjuk Seng Samla Hima ka la shim ia ka sien jam ba nyngkong ban pynkup burom ia ki 13 ngut ki samla pule kiba la wan sha khmat ha ka exam matrik bad XI, kum shibynta ban ai mynsiem ia ki khun samla ka hima ban kin iai minot sha ki jingpule ha ki jingpule ha ki snem ban wan.
Haba phai ha ka jingialehkai, ka kynhun na Sohrarim ka la rah ia ka nam lahduh bad khur ia khusnam song pisa kaba T.10,000, ka Weimynsier ka la wan baar bad khur ia ka song pisa ba T.5000, ka Nongdom Wahjapung ka la ioh rah T.2000. Katba u MA Sun ula rah ia ka khusnam ba T.5000 ha ka jingiakhun para marwei, u Kwik Sun ula ioh rah T.2000 bad u M Sun ula khur T.1000.
Katba Brother Hood ka la rah ia ka nam lahduh ha ka jingialehkai phutbol hadien ba ka la pynliem noh da 4-3 kol pyrshah ia ka Lumsohkhlur bad rah syndon ia ka khusnam ba T.10,000, ka Lumsohklur kaba wan baar ka la rah ia ka song pisa kaba T.5000, kumjuh ruh la pynlong ia ka jingialehkai Volleyball kaba la shim bynta shirhem da ki khynnah samla ka thain.
Shuh shuh la pynphuh pynphieng ia kane ka prokram da ki jingshad tynrai na ka Hima Mahamram bad na ka Elaka Sirdarship, Nongpoh bad ki jingrwai na ki samla pule jong ka Tirot Sing Memorial Kolej Mairang bad kiwei kiwei.(SP News)
