Shillong, Naitung 07: U myntri rangbah ka jylla u Dr Mukul Sangma mynta ka sngi u la ong ba ka cabinet kaba la long mynta ka sngi kala shim ia ka rai banthung noh ia ka ‘Fifth Pay Commission’ ha ka jylla ban peit ia ka jingpynkiew tulop ia ki nongtrei sorkar.
La thung ia u PJ Bazely u chief secretary ba rim ka jylla ba un long u Chairman bad la thung ruh ia u Utam K Sangma bad ia u Bah Lambor Roy kum ki dkhot jong kane ka commission. Halor kane ka sorkar kan sa buh ia ki kyndon trei kam jong kane ka commission.
Kane ka commission jong ka Fifth Pay commission kan sdang ban trei kam noh mar dor hynrei u myntri rangbah ym shym la iathuh pat lano kane ka commission kan ai ia ka kaiphot sha ka sorkar, u la ong ba ia ka por trei kam jong ka kan sa paw ha ki kyndon trei kam.
Ha kane ka sngi ka cabinet kala pdiang ruh ia ka sevice rule jong ka tand PWD, bad ha kane ka tand 80% ki dei ban thung kam katkum ka lynti katba 20% kan long da ka ba pynkiew kyrdan. Ka Kabinet kala pdiang ruh ia ka jingpynkylla ia ka Meghalaya State Language Act, bad kane kan trei kam ha baroh ki 11 tylli ki District ha ka jylla.
Ia ka Contingency fund jong ka sorkar ruh ka cabinet mynta ka sngi kala wanrah ia ka jingpynkylla na ka T.105 klur tyngka la pynkiew sha ka T.205 klu tyngka, la leh ia kane ka long ban pynbiang ia ki jingdon kam ha kaba ia dei bad ka jingwan jong ki skhim kiba dei jong ka sorkar pdeng.
