Shillong, Iaiong 17: Ka Central Executive Committee (CEC) jong ka UDP kaba la shong pyrkhat kam mynta ka sngi kala shim ia ka rai ba kan weng noh ia ka jingai jingkyrshan ia ka People Democratic Forum (PDF) hapoh jong ka KHADC kaba la ialam da u Bah PN Syiem kumu CEM.
U Dr Donkupar Roy President jong ka UDP u la iathuh ha u SP News Agency ba ka dei ka jingshisha ba ka CEM kala shim ia ka rai mynta ka sngi ban weng noh ia ka jingkyrshan ia ka Executive Committee hapoh jong ka KHADC kaba la ialam da u bah Pynshngian.
Ha kane ka jingialang kaba la long mynta ka sngi, la ia don lang ki MLA jong ka UDP bad kum juh ruh ki MDC jong ka party bad kane ka jingialang kala neh da ki bun kynta ban ia mir jingmut ha shuwa ban shimia kane ka rai kaba ki hap ban weng noh ia ka jingkyrshan ia ka EC hapoh jong ka KHADC.
La sngewthuh ba wat la ka UDP kala weng noh ia ka jingkyrshan kan nym treh pat ban ia treilang bad ka seng Congress hapoh KHADC, kin shong ha ka liang pyrshah.
