Shillong, Lber 27: Ka iing dorbar thawain jong ka KHADC ha dien ba kala iathir halor ka kaiphot kaba la aiti da ka House Committee, ia kaba la wanrah hapoh ka iing dorbar mynta ka sngi, ha dien ba la sngap ia ka jingkren jong ki dkhot jong ka iing dorbar kala shim ia ka rai ban phah biang ia ka kaiphot sha ka Executive Committee bad kan sa wanrah pat ia ka sha iing dorbar ha ka sien shong dorbar ka ban wan.
Haba wanrah ia kane ka kaiphot ha poh ka iing dorbar da u Ban PN Syiem Chief Executive Member (CEM), u la pyntip hapoh jong ka iing dorbar ba ha ka 16 tarik mynta u bnai u Lat jong ka jylla, u Banwarilal Purohit u la khot ia u ban ia kren halor kane ka kam bad na ka liang jong, u Lat u la bethah ba dei ban ai noh da ka FIR shuwa ka 25 tarik mynta u bnai.
Halor jong kane ka jingbethah jong u Lat ka jylla, la bethah ia ka secretary jong ka KHADC ba kan ai ia ka FIR bad ki pulit halor kane ka jingkynnoh ba kala don ka jingiasei pisa beain na ka account jong ka Council bad thep sha ka account jong ki riew shimet.
U Bah PN Syiem la kren shai hapoh ka iing dorbar ba ka EC kan nym map iano iano ruh kiba ia don kti ha kane ka kam, lada ka dei ia ki ophisar, lane ia ki para dkhot jong ka iing dorbar, mynta la aiti sha ki pulit bad ai ka ain kan leh ia kaba don kam, lada don ki dkhot jong ka iing dorbar kiba kwah ban iada iano iano ruh ai kin ngat lang.
“ Nga kum u CEM nga lah ban ai ia ka jingbethah tang da ka ktien, hynrei ka dei ka kamram jong ki ophisar ba kin pyniaid ia ka kam katkum ka lynti, ia kano kano ka kam ymdei ban ia lehkai ne ban ia buhrieh, kaba nga lyngngoh ka long mano ba la leit ai ia ka kaiphot sha u Lat jong ka jylla haba ka iing dorbar ka dang phah peit bniah”.
Halor ka jingong ba u Secretary barim u la trei ia ka kam halor ka jingbethah jong ki bor ba halor, u CEM ka KHADC u la ong ba kum u CEM u don ia ka bor ban bethah, hynrei ki ophisar kiba trei ia ka kam pat ki hap ban pyniaid ia ka kam katkum ki kyndon pyniaid jong ka ophis, da kaba pyniaid pynbeit katkum ka lynti.
La ong ba lada ka EC kam ai ia kane ka FIR, kin nym ioh shuh ban dang ia shong ban ia kren, hynrei kaei kaba ka EC kala leh ka long katkum ka jingbethah jong u Lat ka jylla ban ai ia ka FIR ha kaba kum u CEM u la ai hukum ia ka secretary ba ai ia ka FIR.
Ki MDC kiba la ia shim bynta ha kane ka iathir halor kane ka kaiphot kaba la wanrah da ka House Committee ki long u Bah HS Shylla, ha ka jingkren ka jong u tei u MDC na Nongkrem, u la kren ia kaba kaba u secretary barim jong ka KHADC u Bah Welljune Syiemlieh u la ai da ka jubab sha ka House committee ba u la leh ia kane ka kam baroh da ka jingbethoh jong u CEM bad u EM ban Antonio War.
U Bah Shylla u la ong ba u Secretary barim, ym shym la leh dala ka jong ka mon, hynrei u la leh ia kaba la bethah ban leh bad u la trei ia ka kam da ka jingbethah jong ki bor kiba nalor, halor ka jingai FIR la ong ba lada ka EC kam leh kan wan ka synshar jong u Lat katkum ki kyndon jong ka AD Rule jong ka KHADC.
Kiwei ki para dkhot jong jong ka iing dorbar kiba la ia kren ki long u Bah PT Sawkmie, ha kaba u la ong haba la don ka FIR aiu pat kin dang ia kren, u Bah Manstudy Nongrem Chairman jong ka House Committee, Kong Telinia Thangkhiew, Bah Teinwell Dkhar kiba dei ki dkhot jong ka House committee, u Bah Ban Basaiawmoit kine baroh kila pynpaw ba ai ia kane ka kaiphot ban phah biang sha ka EC ba kan leh ia kaba don kam.
Halor jong kane ka jingiakren da ki dkhot jong ka iing dorbar ka KHADC, na ka liang jong u Chairman u bah L G Nongsiej u la buh ia kane ka jingtyrwa ha khmat jong ka iing dorbar la kin pdiang ne em ia kane ka jingpynsngew jong ki dkhot ka iing dorbar, haba la buh ha khmat jong ka iing dorbar ka iing dorbar ka la pdiang ban phah noh ia kane ka kaiphot sha ka EC.
