Shillong, Rymphang 01: Mynta ka sngi ki paidbah na Meghalaya bad Assam kila pynlong ia ka jingialang paidbah ha madan Kyrshai ha West Khasi Hills District bad ha kane ka jingialang kila shim ia ka rai ban pyrshah ia ka Kulsi Hydro Project kaba dei lyngba ka Brahmaputra Board.
Ha kane ka jingialang mynta ka sngi kila shim ia ka rai ban thoh sha baroh ar ngut ki mytnri rangbah jong ka jylla Meghalaya bad Assam, ki paidbah na Assam kin thohsha u myntri rangbah jong ka jylla jong ki bad na Meghalaya kinthoh sha u mytnri rangbah ka jylla Meghalaya ban dawa ba pynduh noh ia kane ka jingthmu ban shna ia kane jaka pynmih light ha ka wah Khri.
Ka jingpyrshah jong ki paidbah ka thain Langpih kiba dei na Meghalaya bad Assam ka long ba lada tei ia kane ka dam um kaba 60 Meters kan pynngam ia ki 25 tylli ki shnong kiba don ha katei ka thain kiba hap hapoh kine ki ar tylli ki jylla Meghalaya bad Assam.
Ia kane ka jingialang kaba la pynlong mynta ka sngi ha Kyrshai la khot da ki sordar shnong na katei ka thain bad ha kane ka jingialang kila shim ia ka rai ba kin kyntait mardor ia ka jingtyrwa ka Brahmaputra Board ban siew da ka bai lut ksan ruh bad kyntu jur ia ki ar ngut ki myntri rangbah ka jylla Assam bad Meghalaya ba kin dawa ban pyndam noh ia kane ka jaka ba thmu ban pynmih bor ding.
Ki shnong ki ban shah ktah katkum ka kaiphoit na DC ophis jong ka West Khasi Hills ki long ka, Doledonga, Talimara, Mawdongkop, Dorkinuli, Mekahmidol,Warigro, Umthali, Hasem,Umbah, Dariphang, Umdiangsiar, Umdiangthing,Sarupani, Barigoan, Ukiam,Borjhar, Cikadonga, Malangoan, Krishnapur, Kapili, Matunggoan, Srigoan, Nongpsung, Kyrshai, Rajabalu.
Katkum ka kaiphot kaba la jurip na ka ophis jong Deputy Commissioner jong ka West Khasi Hills District la kdew ba ki don 766 tyli ki iing na ki 25 tylli ki shnong bad ka jingdon jong ki paidbah nongshong shnong ki long 4666 ngut, haba ia dei bad kane la dep ban ujor naduh u snem 2019.
U Bah KP Pangniang u wei na ki nongshong shnong katei ka thain la ong ba ha kane ka jingialang jan kot hajar ngut ki paidbah kila ia mih na Meghalaya bad Assam ban pynpaw ia kane ka jingpyrshah ban tei ia katei ka Dam um, lada tei ia katei ka Dam kitei ki shnong ki shah ktah bad shari ki leit, ha kane ka jingialang na baroh 25 tylli ki shnong kila ia poi lang ha kane ka jingialang mynta ka sngi.
