Nongpoh, Nailar 14: Ka jingwan u ’lapbah bajur hynnin ka mied ka la pynlong ba ka wei ka jingkieng ha ka wah Umsiang ka dei jingkieng ka ban leit sha ka shnong Umkra ka la shah rong noh hynne ka step ha ka um, bad ka tei ka jingkieng iaid briew ka dei ka jingkieng kab la shu shna da ki dieng.
Ka tei ka jingjia ka la jia mynne ha ka por dang step phyrngap bad ki nongleit nongwan ruh kim pat don satia nalor ba ther u slap ba jur, bad ha ka tei ka jingjia kam shym don kano kano ruh ka jingjia ba sngewsih.
Na ka liang u Bah Julius K Dorphang MLA ka thaiñ u la leit ban jurip ia ka tei ka jingjia ha ka tei ka jaka namar katei ka shnong ka hap ha ka Mawhati Constituency, u la leit ban peit hi dalade ia ka jinglong jingman jong katei ka jingkieng.
Ha katei ka jingjurip la don lang ruh u Rangbah Shnong ka shnong Umkra, u Bah P.S Umbah, ki riew rangbahjong ka shnong bad kiwei kiwei kiba la don ban jurip lang ia katei ka jingjia hynne ka sngi.
U Bah Dorphang, kum u MLA, u la ong ba kum unongmihkhmat ka thaiñ, u la pynpaw ia ka jingsngew jong u ba kane ka jingshah rat jong ka jingkieng ka la long ka jingduhnong ia ki paidbah ba bun kiba dei ban iaid lynti ban kit ia ki mar ki mata jong ki ban leit die ne leit thied leit pet na ki jaka ïew, kum na Shillong bad Umsning bad kiwei ki jak.Bad khamtam kab shakthah ia ki paidbah ka long ka iap ka im bad ka pang ka shitom namr ki hap ban iaid lyngba kane ka jingkieng.
Kumta kum u MLA u la ong ba un sa thoh noh shen kum ka jingpyntip sha ka DeputymCommissioner (DC) jong ka Ri-Bhoi district khnang ba kan pynioh ia ki lad ki lynti ban shna pynbha biang ia katei ka jingkieng ba la shah rat ha ka um.(SP News)
