Shillong, iaiong 28: Mynta ka sngi Bah Jemino Mawthoh MLA ka Nongthymmai Constituency, u la leit ban jurip ia ki surok bad kumjuh ruh ia ki lynti iaid kjat ha ka tei ka konstitwensi ha ka jingiadon ryngkat lang u Rangbah Shnong jong katei ka thaiñ, ki Engineer, ki SDO ka tnat PWD ba kynthup ia u Senior Engineer ka National Highway Shillong Circle u Bah T.Nengnong, u Junior Engineer u Bah H.T. Well bad kiwei kiwei de.
Katei ka jingleit jurip u Bah Jemino ka long halor ban maramot noh ia ki surok bad kumjuh ruh ia ki lynti iaid kjat (footpath) kiba don ha katei ka thaiñ namar ki la khim bad sniew palat bad kane ka buh ia ka jingeh ym tang ia ki kali hynrei wat ia ki paidbah nongleit nongwan kiba shong ba sah ha katei ka thaiñ hi baroh ka wei .
U bah Mawthoh u la ong ruh ba ia kane yn sdang ban pyntreikam noh shen da kaba pyniar shuh shuh ia ki surok jong katei ka thaiñ ban suk ka leit ka wan bad kumjuh ruh ha kaba iadei bad ki ‘nala’ shnong da kaba pynkhuid bha ia ki ban lait na ki jingjakhlia khnang ban wanrah ia ka jingkhuid jingsuba ha ka shnong baroh kawei.(SP News)
