Shillong, Kyllalyngkot 28:Ka Federation of Khasi Jaintia and Garo People seng kmie da ka jingsngewkhia ban ym ioh lad ki company nabar ka jylla ban phrung klhieh ban pyniaid ia ki kam security hapoh ki ophis bad ki jaka pule baheh hapoh ka nongbah jong ka jylla Meghalaya, mynta ka sngi kila leit sha National Institute of Fashion Technology ban dawa pynsangeh shi syndon iaka jingthmu khot tender.
Hapoh ka jingialam u Samla Kitboklang Nongphlang uba dei u Vice President ka FKJGP seng kmie ha ka jingsynran lang bad kiwei de ki para dkhot kila leit sha Umsawli ban ia kynduh ia u Director jong ka National Institute of Fashion Technology, Shillong ban ia kren halor katei ka mat.
Namar ka jingbym don u Director ki dkhot ka seng FKJGP kila hap ban shu ia kynduh noh ia u Joint Director u Bah FD Shanpru bad dawa na u ban sangeh ia ka jingkhot teder ka ba la pynbeit ban long ha ka 29 tarik u bnai kyllalyngkot bad ruh ban plied ha kajuh ka sngi.
Ka jingpyrshah jong ka FKJGP ia kane ka jingkhot tender da ka NIFT ia ki company, ka long ba ka seng ka sheptieng ioh ba ki trai jylla kin duh ia kane ka tender bad lada duh ki nongtrei kiba la don lypa kin duh kam duh jam noh.
Haba kren sha ki lad pathai khubor hadien ba la dep ban ia kynduh ia u Joint Director ka NIFT, u samla Kitboklang Nongphlang u la ong ba ka jingwan ka jong ki ban dawa ban sngeh ka khot tender ka long ban ym ai lad ia ki company bar jylla kin ioh ban rung khlieh ban pyniaid ia ki kam security hapoh ka jylla ia ki skul bad ki ophis ka sorkar kmie kiba don hapoh ka jylla.
“Kane ka jingwan ban dawa pynsangeh ia kane ka jingkhot tender kam dei ba ngi pyrshah iano iano ki trai jylla, hynrei ka daw ba ha khmat eh ka long ban khang lad ia ki company baheh kiba dei nabar ka jylla Meghalaya namar ba lada ioh kiba nabar kan sa don ka jingshah ktah ha ka kam ka jam jong ki samla kiba la trei lypa” ong u Vice President ka FKJGP.
Shuh shuh u samla Kitboklang Nongphlang u la iathuh ba ki kyndon ba la buh ka long ba kano kano ka company ba ioh kadei ban don lypa 100 klur bad kawei pat kidei ban don lypa 2 hajar ngut kiba la trei bad ki bad kane kan shem jingeh ia ki briew napoh ka jylla ban kot katkum kane ka kyndon bad lada jia ba ioh lad ki company nabar ka jylla ka sorkar jylla ruh kan duh ia ka khajna kum na ka GST.
Haba kylli, u Samla Kitboklang Nongphlang u la iathuh ba lada ki bor pyniaid jong ka NIFT kim sngap ia ka jingdawa jong ka seng, ka seng ruh kan ym shong kli kti hynrei kan shim pat da kawei ka sienjam ba tyngeh halor kane ka bynta.
