Sdang ka jingiapher jingmud hapoh ka seng KSU halor ka jingpynkylla ia ka ILP

Shillong, Naitung, 04: Ka jingiapait ia pra hapoh bad ka kynrum kynram hapoh ka Khasi Students` Union ka la nang kham jur  shuh shuh haba don katto katne na ki nongialam jong ka seng na ki pyrshah ba kim iahap satia halor ka Modifief ILP hadien ba 13 tylli ki Sengbhalang bapawkhmat na ka Jylla ki la iakhun tyngeh ban dawa na ka Sorkar Jylla ban pyntreikam ia ka Inner Line Permit.

Myn hynnin  ka sngi, u Donboklang Khriam, Executive Member ka KSU Mawlai Cirle uba bat ruh ha kajuh ka por ia ka kam Organising Secretary ka Mawlai Motsyiar Unit u la phah ia ka shithi iehnohkam sha ki Nongialam ba hakhmat jong ka KSU Central Body.

Ha ba phah ki lad pathai khubor, une u Samla u la ong, `ngan ym lah shuh ban iadon bynta bad ka Seng nangne shakhmat na ki daw kynrum kynram kiba don hapoh iIng ia kaba ym shym la lah ban pynbeit da ki nongialam ka Seng Kmie haduh mynta mynne. Bad ki daw jong ka jingbym hun ia ka Modified ILP.`

Kum  ban shu pynkynmaw dang ha u bnai ba ladep, ka KSU ka la beh seng ia u Samla Donboklang Kharlyngdoh, President ka Mawlai Circle halor ka jing kynnoh  ka jingialeh pyrshah ia ki rukom pyniaid Seng. Ia kane ka jingbeh seng ia une u President ka Mawlai Circle, la kyrshan tyngeh da ki Unit bapher bapher kiba don ha ka Mawlai Circle da kaba pynpaw ba ki kyrshan tylli ia ka rai jong ka Sengkmie ban beh seng noh ia u Bah Kharlyngdoh na ka Union  namar ki pynpaw ba ki dang shaniah ha ka jingpyniaid jong u  Samla Daniel Khryiem bad u Samla Auguster Jyrwa kum ki nongialam ka Seng.

bad ruh  u Bah Peter J. Lawai, Asst. General Secretary ka KSU, Central Body u la phah ia ka shithi iehnohkam sha ka Seng da kaba pynpaw ba um lah shuh ban dang iai bteng ia kane ka kam kaba u la bat baroh shikatta ban long u nongkitkam bad u dkhot ka Seng u la pynpaw ruh ruh ym na kam daw shimet jong u.(SP News)