Shillong, Nailur 20: Ka seng Hynniewtrep Achik National Movement (HANM) mynta ka sngi hapoh ka jingialam jong u Bah Lamphrang Kharbani kum u president kila leit ban ia kynduh ia u myntri PWD jong ka sorkar jylla u Martin M Danggo ban ai ha u ia ka dorkhas ha kaba ia dei bad ki surok hapoh jong ka South West Khasi Hills District bad kiba bun ki surok ba kila kdew ha ka dorkhas ki hap hapoh ka constituency jong u minister.
Ki surok kiba la kdew ha ka dorkhas ki long ban shna bha noh ia ka surok na Rangthong sha Nongnah namar kane ka surok ka dei kaba la rim tam namar la shna naduh ki por jong ka sorkar Assam, ban siang rongnoh ia ka surok na Phlangdiloin sha Wahkaji ter ter shduh ka shnong Nongsumer. La kynduh ruh ia u myntri ba u dei ban bud dien bha ia ka surok kaba dei na Lailad sha Borsora bad ter ter sha duh Nongjri.
Haba ia dei bad kane ka seng kala ong ha kane ka jingthoh ba katkum ka jingtip jong ka seng HANM ia ka pisa kaba ia dei bad kane ka surok la dep ban sei lut baroh katba ia ka jingtrei pat ym pat pyndem. Ka HANM ka kyntu ba u myntri u dei ban bud dien bha ia kane bad lada ka dei shisha dei ban leh katkum ka ain.
Kawei ka surok kaba ka seng kala dawa ba dei ban siang rongnoh ka dei ka surok na Umpung sha Mawpud, haba ia dei bad ka surok na Phlangdiloin sha Phlangmawprah, Nongmluh sha duh Nongmalang dei ban shna bad siang rong noh.
U president jong ka seng HANM u Bah Lamphrang Kharbani,haba kren ha ki nongthoh khubor u la ong ba ki paidbah katei ka thain kila mat ia ki jingeh mynta la 25 snem ha kaba ia dei bad ki surok, na ka liang jong ka seng ka kyntu ia u myntri u ba dei ruh u MLA jong kane ka jaka un shim khia ha kaba ia dei bad kane ka jingdawa jong ka seng.
