Shillong, Nailar 18: Ka kynhun jong ka Film 9-Lad kaba la pynlong ia ka Solo Lockdown Talent Competition (SLTC) ka la jied ia ki 28 ngut ki nongiashim bynta ba kin rung ha ka final rung bad kane ka dei hadien ba ki nongbishar ki la shong ban bishar bniah halor ki video kiba la phah da ki nongiashim bynta bad kiba la thep ruh ha ka Youtube Channel jong ka Commander Shangpliang.
U Director jong ka Film 9-Lad u bah Commander Shangliang uba dei ruh ha ka juh ka por u Producer jong kane ka film kaba la sangeh noh ban pyni namar ka Lock Down u la iathuh ba napdeng kine ki 28 ngut ka kynhun jong k inongbishar (Judge) kin sa jied ia ki nongjop, ki ban ioh ia ka kyrdan nyngkong, baar bad balai, consolation price bad kumjuh ruh ia ki ban ioh ia ka free ticket ynda la pyni biang ia ka film 9-Lad ha ki Cinema.
U bah Shangpliang u la iathuh ruh ba ki nongbishar ha ka 13 tarik mynta u bnai ki la shong bishar bad ki la jied ia ki 28 ngut ba kin rung ha ka final round bad napdeng kine yn sa jied ia ki nongjop ki ban ioh rah ia ka biskit kaba long baroh 20 hajar tyngka ryngkat bad ki tickets.
Kine ki 29 ngut kiba la rung ha ka top 28 lane ka final round ki long kumne Probinus Sangriang, Ibarihun Anithea Kharsati, Angelbert Riahtam, Christina Riahtam, Aman Sohtun, Fenella Ryntathiang, Balajied Ryndong, Mem Millen Snaitang, Quensila Khongjoh, Gaurish Marwein, Valentina Lanong, Aihun Nongbet, Heiwanbha Dkhar, Maxson Rynjah, Charemiki War, Enijes Shadap, Mebarika Sankli, Cylinia Mary Thongni, Sebastian Namsaw, Allayna Alvey Pathaw, Khlainbor Ramsiej, George Eric P Nongbri, Darren J Sawian, Nafica Rapsang, Nangkiewirat Rynjah, Darisha Chyne, Ponderson Thongni bad Nafisha Lyngdoh.
U bah Commander Shangpliang u la pyntip ba shuwa ban pynbna paidbah noh shen ia ki nongjop yn ailad shuwa ia ki paidbah ba kin peit biang ia ka sap jong kitei ki 28 ngut ki nongiashim bynta na ka youtube channel Commander Shangpliang.
Ha kaba iadei bad ka Film 9-Lad u la iathuh ba ynda la ailad biang ban pyni ia ki film na ka liang jongu ruh yn sa pynbiang namar ba kiba bun ki paidbah kiba angnud ban peit ia kane ka film kim pat ioh lad ban peit namar ka jingpynthut noh jong ka jingpang khlam covid-19.
