Shillong, Naitung 10: Ka seng samla pule jong ka Tura Government College kila ioh ban kem ia u wei u briew u ba la shon thok ia ki “Certificate” jong ka Meghalaya Board of School Education (MBOSE) ha dien ba la lap ba la don kiba kwah ban rung class ha katei ka College hynrei laipher ia ki certificate bad kumta la pynlong ia ka jingthohkit bad la ioh ban kem ia u nongshong thok ia ki certificate thok.
Halor jong kane na ka liang jong ki bor ba dei peit ia ka Tura Government College kila ai da ka jingujor sha ki pulit jong ka Tura police station ban tohkit halor kane ka jingioh don kine certificate thok bad ba kin leh ia kaba don kam.
Khlem da pynpaw ia ka kyrteng jong u ba la shah kem na ka liang jong u Bah M Marbaniang, haba kren ha u SP News Agency, ula ong ba ka dei ka jingshisha ba la ioh ban kem ia u briew ba shon ia ki certificate thok jong ka MBOSE, ha ka jaka shon kot kaba don ha North Garo Hills ia kaba la tip kum ka Gabil. Ha dien jong kane na ka liang jong ka MBOSE kala bthah ia baroh ki skul haka jylla ba kin da peit bha ia ki mark sheet bad lada ki don ka jingipher ki dei ban phah sha ka MBOSE ban peit bniah ia ki.
Na ka liang jong u Bah Marbaniang u la ong ba kumba ka long mynta ka MBOSE kan sa thoh sha ka sorkar ba ka dei ban phah shuwa sha ka MBOSE ia ki certificate shuwa ban thung kam iano iano ha ki ophis sorkar ban lap ia ki jingshisha la ki dei certificate kiba biang ne em. Kumba ka long haduh mynta ka sorkar jylla kam juh phah sha ka MBOSE.
Kiwei ki ophis jong ka sorkar pdeng kiba don ha ka jylla Meghalaya shuwa ba kin thung kam iano iano ha ki ophis jong ki, ki phah sha MBOSE ban pynshisha ia ki certificate, kumjuh ki kompeni kiba heh shuwa ban kin thung kam kida wan sha MBOSE ban leh ia kaba don kam bad nangta ki sa thung kam ia ki briew.
Ka por kala dei ruh ia ka sorkar jylla ba ka dei ban phah sha ka MBOSE ia ki certificate ban peit bniah shuwa ba kan thung kam bad u bah Marbaniang u la ong ba ha kane ka liang kinnym shim pisa kumba ki leh ia kiwei kiwei certificate ne ki jingpynshisha.
