Shillong, Risaw 30: Ha ka jingialeh boll jong ka second round 29 tarik October 2016 ha Smit jong ka 2nd Inter Hima Seng Samla Kur Knockout Football 2016, ha ka jingialeh kaba nynkong por 11.30am ka kur Marbaniang (Hima Mylliem) ka la pynliem ia ka kur Khongsngi Hima Khyrim da kaba pynkhih jar ar sien 2-0 lyngba u Kyntipborlang Marbaniang bad u Augustborn Marbaniang.
Ha ka jingialeh kaba ar por 1.30pm mynsngi ka Kur Thongni (Hima Nongstoin) ka la pynliem ia ka Kur Mawthoh (Hima Khyrim) da 3 goal lyngba u Pyniaid Thongni; Kuparwel Thongni bad u Kyrshanbor Thongni.
Ha ka jingialeh kaba lai por 3.00baje mynsngi ka kur Rynjah(Hima Khyrim) ka la pynliem ia ka Kur Sun (Hima Marbisu) da 3 goal lyngba u Arshon Rynjah; Kostarwin Rynjah; bad u Everestarly Rynjah. Ha kane ka jingialeh la iohi ba ki Kur Rynjah ki la ia mih paidbah ban kyrshan tylli ia ki samla Kur ha ka jingialeh boll ki Kur ha Smit. Kumban shu pynkynmaw ba ki Kur Kharbyngar, Buam, Nongkhlaw bad Mukhim ki la ioh rung sha ka round kaba lai.
Ka jingialehkai kaba ar kan dang bteng biang ha ka 4 tarik November 2016, ha ka por 11.30 am ka jingialeh kan long ka Kur Sohtun (Hima Mylliem-Khyrim) vrs Nongbri Hima Mylliem, por 1.30pm ka kur Khongwet Hima Khyrim bad Kurbah Hima Marbis) bad por 3pm ka Kur Nengnong Hima Khyrim bad Kharumnuid Hima Khyrim.
