Shillong, Lber 21: Mynta ka sngi ki nonghikai Adhok kiba hikai ha ki Lower Primary bad Upper prime bad Higher secondary skul kila pynlong ia ka jingialang paidbah ha Madan Malki ban dawa na ka sorkar ia ki ar tylli ki mat, kawei ba ka sorkar kan pynkiew ia ka tulop bad ba kan ithuh noh ia ki ha ka kyrdan deficit.
Haba kren ha kane ka jingialang paidbah u wei na ki nongialam u bah Mayborn Lyngdoh la ong ba kane ka jingiakhih ka long naduh ki nonghikai LP haduh ki nonghikai High School bad ka thong ka long ban dawa na ka sorkar ba ka dei ban pynkiew noh ia ka tulop jong ki nonghikai.
Haba ia dei bad ka tulop jong ki nonghikai skul adhok la ong ba kam long ryntih namar ki iapher ka jingsiew na kawei ka skul sha kawei pat, la ong ba ki nonghikai ki don kumba 8000 ngut ei ei kine ki lah ban tam ne duna hynrei ki nonghikai adhok ki don bun ha kane ka jylla Meghalaya.
La ong ba ia ka tulop jong kiba hikai adhok la pynkiew khatduh ha u snem 2016 bad kane kala sah haduh mynta na ka liang jong ka seng ha ka lama jong ka Federation of All School Teachers of Meghalaya (FOSTOM) kala dep ban thoh sha ka sorkar hynrei kam shym la ai kano kano ka jubab.
Ha kane ka jingialang na ka liang jong ki nonghikai kila shim ia ka rai ban leit tur sha Secretariat hynrei na ka liang jong ki Magistrate kiba don ha katei ka jaka kila pynsngewthuh ia ki nonghikai namar ba ki khlem ioh jingbit yn nym shah ia ka jingiaid paidbah.
Ha dien kane ka jingiakren na ka liang jong ki nonghikai kila sngap ia kaei kaba ki Magistrate ki pynsngewthuh bad kila sangeh ka jingthmu ban leit tur sha Secretariat , hynrei kila rai ba kin pan jingbit na ki bor sorkar ban pynlong ia ka jingiaid paidbah sha khmat Secretariat.
