Shillong, Iaiong 17: Ki kmie ki kpa jong ki khynnah skul kiba phah skul ia ki khun jong ki ha ki skul SSA hapoh ka jylla ki pynpaw ia ka jingsngewkhia jur ia ka jingbymlah ka sorkar ban pynurlong ia ki jingdawa jong ki nonghikai SSA bad fourth teachers hapoh ka jylla ha kaba ka sorkar kala pynbor ia ki ban iakhih da kaba sangeh treikam ban pynpaw ia ka jingleh mynthi jong ka sorkar.
Kum ki kmie ki kpa ki sngewnguh shisha ba da ka jingwan jong ka SSA ka iarap shibun ia ngi khamtam ha ki thain nyngkyndong ba ka la plie lad ia ngi ban ioh phah skul ia la ki khun ki kti, ngi iaroh ruh ia ka jinglongkloi, trei shitom bad len lade jong ki nonghikai ha ki SSA skul ban ai ia ka jingnang jingstad kaba janai ia ki khun ki kti jong ngi wat ha ka jingsiew kaba rit lada ia nujor bad kiwei pat ki nonghikai hapoh ka jylla.
Kun ki kmie ki kap kila sakhi ruh shibun ki jingiakhih jong ki nonghikai SSA ha kine ki por bala dep ban kyrpad sngewrit ha khmat ka sorkar ban sngewsynei bad ban iarap lem ban thaw ia ki lad ki lynti ban kham pynheh ia ka jingsiew jong ki khnang ba ki lah ban bsa ia la ki khun ki kti katkum ka jingiaid jong ka por, namar kam long kaba suk ban pynbiang ia ka ing ka sem tang ha i jingsiew iba 6000, 9200 bad 9900. hynrei kaba pynlyngngoh ia ki kum ki kmie ki kpa ka long ba ka sorkar ka shu sngapjar jar bad leh bym bna ia ki jingkyrpad jong ki.
Lada dei ka sorkar kaba peit shisha ia ka bha ka miat lang jong baroh bad kaba don jingkitkhlieh ban kyntiew ia ka jingnang jingstad ha ka jylla ka la dei ban khot iakren ia ki nonghikai bad wan sha ka jingiasngewthuh jingmut namar da kaba sngap jar bad phai dadien kam lah ban wanrah da lei lei ia ka jingbha. Lada dei ba ka sorkar ka shim khia ia ki jingdawa jong ki nonghikai kim tharai ba kan poi haduh une u pud ba kin shim tyngeh da ka rai ban sangeh treikam khlem pud sngi.
Halor kitei ki nongrim haneng kum ki kmie ki kpa ki ai jingkyrshan pura bad ai mynsiem ia ki nonghikai SSA bad fourth teachers hapoh ka lama jong ka Meghalaya SSA School Association ha kane ka jingiakhih jong ki ban ioh ia la ka hok kumjuh ki kyrpad ia ki nonghikai SSA bad ki nongialam jong ka seng ban pynjynsur ia kane ka strike sha ka ar ne lai sngi la da ki sngewiahap bad sa shim pat da kiwei ki sienjam khnang ba kan ym ktah ia ki khun ki kti ha kaba ma ki ruh ki kmie ki kpa kin iashim bynta lang ban pynrem ia ka sorkar.
Na ka liang jong ki kmie ki kpa ki kyrpad ruh ia ka sorkar u Dr mukul sangma ban shim khia bad pynurlong ia ki jingdawa jong ki nonghikai kham kloi ne lada ka sorkar ka sngew ba ka jingdawa jong ki kim long kiba shongnia bad shong nongrim kren da kaba shai bad lada ka sorkar kam lah ban leh kumta ka hap ban shim jingkit khlieh ia ka lawei ki khun ki kti jong ngi bad kam dei shuh ban kynnoh ia ki nonghikai. Kane ka long katkum ka kyrwoh kaba la phah bad soi da ki kmie ki kpa jong ki khynnah kiba phah skul ha ki skul SSA jong ka sorkar.
