Guwahati , August 09: U myntri rangbah barim jong ka jylla Arunachal Pradesh u Kalikho Pul u la khad noh ha iing sah jong u ha Itanagar ka nongbah jong ka jylla Arunachal Pradesh, la lap ia ka met iap jong u ha ing bad la suba ba ka dei ka jingpyniap hi.
Ha ka jingpynlait khubor na ka liang jong ka sorkar Arunachal Pradesh, la ong ba na ka liang jong ka cabinet ka pynpaw ia ka jingsngew kyndit kaba khraw ban iohi ba une u rangbah u ba la ieh bha ha ka sain pyrthei u la duh noh ia ka ka jong ka jingim khlem da poi pyrkhat.
La ong ba ka jingdon jong u ha ka sain pyrthei kala wanrah ia shibun ki jingkylla ha ka jylla baroh kawei ha kaba ia dei bad ki paidbah, na ka liang jong ki paidbah kin iai kynmaw ia u kum u nongialam ha kaba ia dei bad ka sain hima sima.
Ha kum kane ka por jong ka jingsngewsih na ka liang jong ka sorkar bad ka kynhun myntri baroh kawei ka phah ia ka khubor sngewlem sha kiba ha iing ha sem baroh ha kum kane ka por jong ka jingsngewsih.
Na ka liang jong ka Kabinet kala shim ia ka rai ban pyndep ia ka jingpynkhuid ia ka met jong u da kaba leh burom katkum ka rukom kaba dei jong ka sorkar bad la pynbna ruh ba lai sngi lynter kanlong kum ki sngi iam briew ha ka jylla, kane ka long katkum ka khubor kaba la phah da u joint secretary jong ka kabinet na ka sorkar Arunachal Pradesh.
