Jowai, Jymmang 03: Ka Khasi Students’ Union War Jaintia Circle ha ka 2 tarik mynta u bnai hapoh ka jingialam u President Samla Laitphar Syngkrem, General Secretary Samla Lurman B. Talang bad Organising Secretary ka District Samla Leningrad Tariang bad u Finance Secretary Samla Kindly Khyriem la leit iakynduh ia u Deputy Commissioner, West Jaintia Hills District.
Kane ka jingleit ban ia kynduh ka long ban pynpaw ia ka jingpyrshah ia ka jingthmu ka Sorkar ban pynlait ne ailad ia kawei ka company York Print Pvt. Ltd. ban shalan ia ki mar ki mata na Deoduar, Kamrup lyngba ka jylla jong Meghalaya ban pynpoi sha Bangladesh lyngba ka Tamabil Check Point, Dawki.Ha kane ka jingiakynduh kila ai ruh ia ka syrnot sha u DC.
Ka Seng halor kane ka pynpaw ia ka jingpyrshah jur ha u Deputy Commissioner ba halor ba dang jur une u khniang jingpang Covid 19 jan baroh kawei ka Ri ki khang pyrshah ia ki kali ban iaid kulmar bad ka Assam haduh mynta ki dang don kiba ioh ia une u khniang jingpang kan ap jingma lada wan ki briew kiba don ia une u khniang jingpang.
Ka Seng ka iohi ruh ha kine ki por ba la dep wat hapdeng ka jingkhang lad ia ki briew ba nabar ban wan rung shapoh ka jylla hynrei ki dang hi ban wan namar kam shym biang ka District Administration ban peitngor bha ia ki kali ban check bha.
Ka Seng ka pynrem jur ruh namar ka Sorkar kam shym lah ban batai bha katkum ka shithi ki mar ki mata aiu kita bad balei ba ym long mo ban sangeh shwa kat bym pat khuid bha une u khniang jingpang.
Ka Seng ka kyntu ia ka Sorkar Jylla ba kadei ban pynsangeh mardor ia kane ka kam khnang ba kan ym don ka jingthut ha ka imlang sahlang bad ka dei ruh ban pyrkhat bha shwa ban issue kum kine ki order. Kane ka long ka kyrwoh na u General Secretary Samla Lurman B. Talang.
