Shillong, Nohprah 10: Mynta ka sngi ka KSU kala phah da ka jingthoh sha u myntri ka sorkar pdeng u A. Narayanswamy ba dei peit ia ka State for Social Justice bad Empowerment jong ka sorkar pdeng ban kyntu ia u ban buh ia ka jaka pule Dr. Ambedkar Centre of Excellence ( DACE) ha skul bah NEHU.
Ha ka shithi ka KSU kala kren shai ba ka dei ka seng samla pule kaba peit ia ka bha ka miat ki jaidbynriew khasi, na ka liang jong ka seng kala iohi ba la plie ia ka Dr. Ambedkar Foundation (DAF) da ka tnad Ministry of Social Justice bad Empowerment ban buh ia ka jaka pule Dr. Ambedkar Centres of Excellence (DACE) ha ki 31 tylli ki skul bah jong ka Ri India.
Ka jingthmu ka sorkar pdeng ban buh ia kine ki jaka ai jinghikai ka long ban ai jinghikai ei ia ki rit paid ban ia khun ia ki eksamin Civil Services examinations kaba pyniaid da ka Union Public Service Commission (UPSC) ha ka 23rd Jymmang 2022, ka skul bah NEHU kala ia soi ia ka MoU bad ka DAF ban sdang ia ka DACE scheme ha NEHU.
Ha ka shithi ka KSU kala kdew ba ka jylla Meghalaya ka dei ki riewlum bad ia ka skul bah NEHU la seng ha u snem 1973 bad kane ka skul bah ha dei peit ia ka jylla Meghalaya baroh kawei, kane ka DACE ka long ban ai jingiarap ia ki riew lum kiba don ia ka jingthmu ban ia khun ia ka Civil Services Examination.
Dei ha ka 25 Jymmang 2022 ka seng kala phah da ka jingthoh sha u Vice Chancellor ka skul bah NEHU ha kaba kala kyrpad ban buh ia kane ka jaka ai jinghikai ha NEHU, namar ka NEHU ka dang don shibun ki jingduna lada ioh ia kane ka jaka hikai ha NEHU kan iarap ia ki paidbah ba dei ki riew lum kane ka jylla Meghalaya kiba thoh ia ka Civil Services Examination ba pynlong da ka UPSC.
Ka KSU kala pynkynmaw ba ha ka 12th Nailar 2022 u ophisar u la thoh sha u Dr. Vikas Trivedi, Director ba dei peit ia ka Dr. Ambedkar International Centre, Ministry of Social Justice bad empowerment, Government jong ka sorkar pdeng ha kaba u la kyrpad ban ai jingbit kynthup lang ia ki OBC bad ST.
Ka KSU kala kdew ruh ba namar ia ka Tribal development Division la pynkylla sha ka Tnad ba dei peit ia ki Tribal Affair ha u Risaw 1999, kumta ki kam kiba ia dei bad ki riewlum kam hap shuh hapoh jong ka tnad Social Justice bad Empowerment kumta la kyrpad ban kynthup noh ia ki ST hapoh ka DACE hapoh ka skul bah NEHU ba kin ioh jinghikai ban ia khun ia ki Civil Service jong ka sorkar pdeng, ia ka shithi la soi da u shongknor ka tnad pule ka KSU u samla R Kharjana bad u samla R Najiar Secretary.
