Shillong, Naiwieng 11: Mynta ka sngi ki khlieh nongsynshar na ki saw tylli ki hima kiba hap ha khappud bad ka jylla Assam kila thoh sha u Deputy Commissioner jong ka West Khasi Hills District ba dei ruh secretary jong ka Regional Committee ha kaba ia dei bad ka jingiakren pynbeit pud ha ki bynta ba hap hapoh jong ka Kamrup jong ka Assam bad ka West Khasi Hills District.
Ki khlieh nongsynshar jong ki saw tylli ki hima ha ka shithi kaba kila thoh kila kren halor ka jingleit jngoh jong ki ki dkhot ka Regional Committee ha kaba ia dei bad ka jingiakren pynbeit pud ha ki jaka kiba ia kam mar kylliang kiba hap hapoh jong ka West Khasi Hills District.
Ha ka shithi kaba kila thoh kila kyntu ia u Deputy Commissioner ba u dei ban pyntip sha ki ia ka por bad ka jaka ba ka Regional Committee kan leit ban jurip khnang ba kin lah ban ia don lang ban pyni ia ki kot ki sla ha kaba ia dei bad ki jaka kiba hap hapoh ka jingsynshar ka jong ki.
Ki khlieh nongsynshar kiba la phah ia ka shithi ki long u bah Pholasly Nianglang Sirdar jong ka Nonglang Sirdarship, Langdongdai, u Syiem ba shipor jong ka Nongmynsaw Syiemship, u Pa,im P. Syiem Nongbah , u bah N. Syiem Jahnoh Sirdar jong ka Jyrngam Sirdarship, Tynghor , u Bah K T Pangniang secretary jong ka Riangsih Sirdarship, Myndo.
