Shillong, Nohprah 05: U bah Pyndapbor Saibun president jong ka KHNAM mynta ka sngi u la thoh da ka shithi sha u Bah Adelbert Nongrum ban kylli mynno la pyndom ia ka Central Executive Committee jong ka KHNAM hapoh ka jingialam jong ka u.
Ha ka shithi kaba la phah mynta ka sngi u bah Pyndap u la ong ba “Ha ka por ba phi resign phi la address sha nga kum u President ka Seng ia ka shithi jongphi- kane ka mut ba nga dang dei u Nongialam. Haba kumta, kumno mynta phi kam ba phi la dei u nongialam”.
U Bah Pyndap u la ong ba kila ap lajan dap ar bnai ba u Bah Adelbert un wengnoh ia ka shithi resain u bad ha kaba khatduh kila pdiang noh hadien ba u kren shai ha ki lad pathai khubor ba phin ym weng. Hadien ba la pdiang ia ka jingiehnohkam jong u (3/9/2018), um dei shuh u dkhot ka CEC bad um lah ban pynlong kano kano ka jingjied thymmai ia ki dkhot ka CEC.
Ha kane ka shithi kaba la phah mynta ka sngi u bah Pyndap u la kdew ba kumno tang hapoh 11 sngi ba ha ka 14/09-2018 u la da leit kam sha ka ECI ba la jied thymmai ia u kum u president ka seng, da kano ka bor bad halor kino ki kyndon la jied ia u kum u president ka seng la kylli u bah Pyndapbor.
U Bah Pyndap u la ong ba kino kino ki rai ki ba la shim na ka Central Executive Committee jong ka seng, lada la mynjur da ki ba bun ki dkhot kan hap ban ieng bad ym lah ban iapein naka bynta jongno jongno ruh.
Ka seng ka la dep ruh ban phah shaphi ia ka shithi kaba la batai shai bha kumno la shim ia ki rai halor ki ticket MDC na ki ar tylli ki constituency bad kam donkam shuh ia ki ban dang pynshai palat ia kaei kaba ki la dep ban pyntip. La ong u Bah Pyndapborthiaw Saibon ha ka kyrwoh mynta ka sngi.
