New Delhi, Rymphang 16: Ha ka sienjam kaba kongsan ka ban pynkhlain ia ka rukom ai jinghikai jong ka ri ia ki nongialehkai, ka Sports Authority of India, Tnat Youth Affairs and Sports, Sorkar India ka la jied ban thung haduh 398 ngut ki coach ne ki nongai jinghikai pyntbit ha ki kyrdan bapher bapher jong 21 tylli ki jait jingialehkai.
Napdeng kine ki 398 ngut ki don ruh ki nongialehkai barim bad ki nongjop khusnam Arjuna kiba la iakhun lane jop takma ha ki lympung ialehkai ba paw kum ka World Championship bad Olympics. Na ki 398 ngut, 101 ngut ki coach ki iasoh ha ka rukom treikam deputation na ki PSU bad kiwei kiwei ki kynhun sorkar.
Kane ka jingpynrung kam ka la long halor ka jingialeh ka Tnat Youth Affairs and Sports ban ai jingkyrshan radbah ia ki nongialehkai haba ki pynkhreh na ka bynta ki jingiakhun ba kongsan ha ka ri bad shabar ri, kynthup ia ka Olympics 2024, 2028.
“Nga sngewkmen ba ki nongialehkai barim kiba la iakhun ha ki lympung ialehkai ba paw ha kylleng ka pyrthei bad kiba la jop takma ki la aplai ia kine ki kam bad ki ladep ban shah jied,” ong u Myntri sorkar pdeng ba dei peit ia ka Tnat Youth Affairs and Sports, u Anurag Singh Thakur.
“Ka jingshim ia ki ha kane ka kam kan long ba nalor ka jingai jinghikai ia ki nongialehkai ha ka kam ialehkai, kin lah ban ai jinghikai ruh ha kaba iadei bad ka jingskhem jingmut kaba long ka bynta ba kongsan sha ka jingjop haba iakhun ha ki rynsan ialehkai ha kylleng ka pyrthei.”
Ha kane ka batch ba thymmai jong ki coach bad ki assistant coach ki don ruh ki briew ba pawkhmat ba kynthup ia u nongioh khusnam Padma Shri bad khusnam Arjuna, u Bajrang Lal Thakar uba la jop takma ksiar ha ka Asian Games bad u la iasoh kum u coach ha ka jingialehkai kieng lieng.
Ka Shilpi Sheoran kaba la jop takma Ksiar ha ka Commonwealth Games ha u 2011 ka la iasoh kum ka assistant coach ha ka wrestling, Ka nongialehkai Olympics, ka Jincy Phillip ka la iasoh kum ka coach ha ka athletic, Pranamika Borah kaba la jop takma bun tylli ha ki lympung ialehkai shaba ri ka la iasoh kum ka coach ha ka boxing.
Haba kren shaphang ka jingsngew jong u shaphang kane ka kam kaba thymmai, u nongjop khusnam Arjuna u Bajrang Lal Thakar u la ong, u sngewnguh ia ka Sports Authority of India kaba la ai ia nga ka lad ban siew kylliang sha ki kam ialehkai kum u coach khamtam ha ka por haba ka water sports ha India ka don ka lad kaba khraw ban lah ban ialehkai bha ha ki lympung ialehkai shabar ri.
La ong ba un ai jinghikai ia ka kynhun na ka bynta ka Asian Games bad nga sngewskhem ba da ka pynmih bun ki nongialehkai ha bun ki jingialehkai ngin lah ban ioh bun ki takma na ka bynta ka ri ha ka Asian Games ban wan.
U Thakar u la bynrap ba ka water sports ha India ka la ioh jingkyrshan na ka National Centers of Excellence jong ka SAI ha Jagatpura bad Alleppey kiba la biang ki jingdon jingem katkum ka juk mynta na ka bynta ban ai jinghikai ha ka water sports.
Napdeng kiba la shah jied na ka bynta kane ka kam, ki don 4 ngut ki nongjop khusnam Arjuna, uwei u nongjop khusnam Dhyanchand bad uwei u nongjop khusnam Dhronacharya.
Nalor ki nongialehkai barim, kito kiba la pyndep ia ka Diploma jong ki ha ka Sports, Coaching na NSNIS Patiala lane ka skul bah ba la ioh jingithuh ha India bad na shabar ri ruh kumjuh la pynrung lang. La thung biang ia ka kam jong bun ki coach jong ka SAI kiba la kut ka contract katkum ka jinglah treikam jong ki.
