Shillong, Naitung 21: U Bah Wanlambok Kharsati Secretary jong ka sorbar shnong Mawryngkneng jong ka Hima Khyriem Syiemship mynta ka sngi u la ai ia ka jingujor FIR pyrshah ia ka PHC kaba don ha Mawryngkneng bad u officer Incharge jong ka Mawryngkneng police out post pyrshah ia ka tei ka PHC kaba dei jong ka sorkar jylla.
Ha kane ka jingujor u Bah Kharsati u la ong ba ka PHC ka dei kaba la buh da ka sorkar bad kane ka dei ka jingangnud jong ki paidbah jong ka shnong bad ki shnong kiba don sawdong jong katei ka jaka namar ba kane ka dei ka jaka ba ki paidbah kin ioh ia ki jingsumar kaba nyngkong shuwa ba kin leit sha kiwei ki jaka ai jingsumar ha ka por ba ki pang ki shitom bad ki briew katei ka thain kiba burom haduh katta katta ia ki doctor.
Ha kae ka jingujor kaba la ai mynta ka sngi sha ki pulit, la ong ba ia kane ka PHC la dei ban peit da u ne ka doctor bad ban don ha kane ka jaka ha ryngkat ka jingdon lang jong ki nongtrei, hynrei kaba sngewsih ka long ba bun na ki nongpang kiba leit ban shim dawai na kane ka hospital kila hap ban mih noh khlem da lah ban ia kynduh ia ka doctor bad bun sien kila hap ban leit sha Shillong ban phah sumar namar ba ka doctor kaba don ha kane ka jaka ka poi sha jingtrei kat hala ka mon la thoh ha kane ka FIR.
La ong ba kane ka jingwan trei ka doctor katba ka man kala buh ia ki paidbah ha ka jingeh kaba khraw bad ka long ka jingma ia kiba pang ba shitom namar ka jingbym don thikna ka doctor, ha ka juh ka por la ong ba kane ka PHC kam don ia ka light , kam biang ki dawai, lada ka long ha kane ka rukom ka doctor ka dei ban shim ia ka jingkit khlieh namar ba kam kit khia ia ka kam.
La thoh ruh ha kane ka jingujor ba na ka liang jong ka shnong na ka por sha ka por la juh ia kren ia kane ka kam bad ka doctor kaba dei peit ia kane ka PHC, hynrei kane ka jingiakren baroh ka long sep ei bad kane kala ktah ruh ia ka jingtrei shitom jong ki nongtrei kiba don ha kane ka jaka miet bad sngi ban ai ka jingshakri ia kiba pang ba shitom.
Dei halor kitei ki jingeh kaba ki paidbah ki ia kynduh, mynta ka sngi la ai ia kane ka jingujor sha u OC jong ka Mawryngkneng police Out post ba un tip ba lada don kano kano ka jingjia kaba sngewsih ha kaba ia dei bad ki ba pang ba shitom ka doctor kaba la buh ha kane ka jaka ka dei ban shim ia ka jingkit khlieh bad ba dei ban leh ei ei.
Ia kane ka juh ka jingujor la ai kotpi ruh sha u myntri ka koit ka khaih jong ka sorkar Meghalaya, la air uh sha ka Registar general High Court jong ka jylla Meghalaya kum ka jingpyntip bad la phah ruh sha ka u Commissioner bad Secretary ka tand ka koit ka khiah lem sah u Director Health Services, health bad Family welfare jong ka sorkar jylla, ha kane ka sngi ba leit ban ai ia kane ka jingujor la don lang ruh u rangbah shnong ka Mawryngkneng u Peter Lawai.
