Khliehriat, Lber, 23: Ka AJYWO Central Body mynta ka sngi hapoh ka jingialam u Bah M.H Dkhar, President jong ka, bad u Bah Heatermoon Ryngkhlem President, ka AJYWO-EJZ, ka la leit buh syndon da ka jingujor ha DC ka East Jaintia Hills District, u Bah M.S Lhuid, IAS, pyrshah ia kawei ka karkhana ha Lad-Jalyiah, tha ki thaiñ Lad-Rymbai halor ka jingpynmih tdem iong jong ka man la ka sngi bad ruh halor ka jingspel dak bad thoh kulmar ka GR Infra Ltd ia ki kyrteng shnong bad jaka ha ki signboard lyngba u NH-44 ha Jaintia Hills.
“Shwa ba ka NGT kan khang ia jingtrei dewiong ha Meghalaya, ia katei ka karkhana kaba don ha Lad-Jalyiah la tip kum ka M/s Abhi Coke Factory kaba thang dewiong hynrei hadien ka jingkhang trei dewiong ka NGT, katei ka karkhana ruh ka la khang noh, hynrei dei dang ha kine ki khyndiat taiew ba la dep ba la iohi biang ia ka tdem kaba iong bad sma iwtung kaba la mih man la ka sngi na ka atoskhana jong katei ka karkhana ka ba lah ban ktah iaka mariang bad ia ka koit ka khiah jong u briew” ong u Bah H, Deolangki Dkhar, Secretary General, ka AJYWO Central Body.
“Ngi suba jur ba katei ka tdem ba rben bad ba iong kaba pynmih na katei ka karkhana ka lah ban ktah jur ia ka koit ka khiah jong u paidbah ba shnong ba sah sawdong jong katei ka karkhana bad ruh ia ki nongleit nongwan lyngba jong ka NH-44 bad khamtam eh ia ki khynnah skul jong ka Good Shepherd Secondary School kaba don tang mar shilliang surok bad katei ka karkhana”, ong sa u Bah J.Reachingson Siangshai, Vice President, ka AJYWO Central Body.
“Ka AJYWO kan ym ailad da lei lei ruh em ba kiwei kin kamai spah da kaba buh ia ka koit ka khia jong u paidbah ha ka jingma. Kumta, ha ha ka jingiakynduh jong ngi ia u DC mynta ka sngi, ngi la dawa na u, ba u dei ban sngewbha ban jurip noh mardor ia katei ka karkhana bad ban khang noh ia ka shisyndon lada ka jingdon jong ka ka ktah ia ka jinglong khuid ka mariang bad buh ia ka koit ka khiah jong u paidbah ha ka jingma”, ong biang u Bah H.Deolangki Dkhar.
“Ha kane ka juh hi ka sngi, ha ka jingiakynduh jong ka AJYWO bad u DC, kum ban bud dien ia ki jingdawa jong ka AJYWO na ka GR Infra Ltd, ka company kaba dang pyntrei mynta ia u surok NH-44, halor ka jingdawa ba dang shen jong ka seng ban pynbeit noh mardor ia ki jingspel dak bad thoh kulmar jong ka ia ki shong ki thaw bad ki jaka puta ha shilynter jong ki signboard bad pillar jong utei u NH-44, kaba la ialam bakla ia u paidbah nongleit nongwan bad ruh khamtam eh kaba la ktah jur ia ka jingsngew jong ki trai trai ri trai muluk, ka seng ka la buh syndon ruh da ka jingujor pyrshah ia katei ka jingleh jong katei ka company bad dawa ruh na u DC ba un sngewbha ban bthah noh shisyndon ia katei ka company ban pyndam noh bad ban thoh pynbeit noh ia baroh kitei ki jingspel dak kulmar jong ka ha kitei ki signboarb bad pillar.” La pynkut u kyrwoh na u Bah J. Reachingson Siangshai.
