Ujor ka KSU sha ka SDO Amlarem ba ioh rung kyrteng ki bar jylla ha ka electoral roll

Shillong, Jylliew 19: Ka Khasi Students’ Union War Jaintia Circle mynta ka sngi hapoh ka jingialam u President Samla Laitphar Syngkrem, General Secretary Samla Lurman B Talang bad ha ka jingiadon ryngkatlang u President District Samla Ohibait Dkhar bad Organising Secretary Samla Leningrad Tariang la leit iakynduh ia ka SDO (Civil) Amlarem Sub Division ban ia kren sani bha bad ban dawa ban weng noh (delete) ia baroh ki Non Tribal kiba don ha la ki polling station bapher bapher hapoh ka 7th Amlarem Constituency.

Ha kane ka jingiakynduh na ka liang ka seng ka la pynsngew ha kaba ia dei bad ka jingiohrung jong ki bar jylla ha ka Electoral Roll ka long kaba buh jingma shikatdei eh ia ka thian War Jaintia khamtam kito ki shnong khappud bad ka Bangladesh namar kine kiba ioh ia ki Epic la suba jur ba kidei ki nong Bangladesh.

Ha kane ka jingiakren la iadonlang ruh u Rangbah Shnong jong ka Muktapur kawei na ki shnong kaba dei ha khappud Bangladesh ha kaba na kane ka shnong .ki don ki bar jylla kiba ioh rung ha ka Electoral Roll.

Na ka liang jong une u Rangbah Shnong ha ka jingiakren ha kane ka jingiakynduh u la kular hakhmat jong ka SDO bad ki nongialam jong ka Seng ban shim ia ka Executive Committee na ka bynta ban shim rai ban weng mardor ia kine ki bar jylla kiba ioh Epic hapoh ka shnong Muktapur bad u la kubur ba kine ki jingaisyrnod ne ban ai kino kino ki kot ki sla ki ban pynshisha ia ka jinglong trai shnong ka long kaba bakla.

Ha kajuh ka por ula kyntu sha baroh ki Rangbah Shnong hapoh War Jaintia ba nangne sha khmat ki dei ban da pyrkhat sani bha ha kaba iadei bad ki bar jylla ba ym bit ban shu pynshisha ba kidei ki trai shnong namar hadien habud ka buh ia ka jingma ka khraw ia ka pateng ka ban sa wan.

Na ka liang ka SDO ka la kyntu ia ki Rangbah Shnong hapoh War Jaintia ba ia kino kino ki briew kiba wan nabar ym dei ban shu pdiang kulmar khlem kano kano ka jingpynshisha kum ka police verification bad ban pynshisha ruh na kano ka jaka ba ki wan bad kaei ka kam kaba ki trei bad badno ki wan sha kane ka jaka namar ka buh jingeh hadien habud ban shu pdiang kulmar ioh jia ba kidei ki briew kiba don dak sniew tang ban wan shimkabu lane leh ki kam sniew ha shnong ha thaw ne ha ka thain War Jaintia.

Ha kajuh ka por ka la kular ruh ha khmat ka seng ba kan khot jingialang rut ia baroh ki Rangbah Shnong jong ka thain War Jaintia kiba don kine ki bar jylla kiba iohrung ha ka Electoral Roll hapoh Shnong jong ki. Khatduh khatwai na ka liang ka Seng lyngba une u kyrwoh ka kren shai ba ha kaba iadei bad kane ka mat kan ym shong kli kti kan iai buddien sha baroh ki shnong hapoh War Jaintia ioh don kum kine ka seng da kajuh ka lynti kan iaid na ka bynta ban phah weng mardor khnang ba kan suk ka pateng ban sa wan bad kan im ka jaitbynriew.

 

What Next?

Recent Articles

2 Responses to "Ujor ka KSU sha ka SDO Amlarem ba ioh rung kyrteng ki bar jylla ha ka electoral roll"

  1. Aiborlang Syndai says:

    Ka don ka shnong ba dang mih shen hajan muktapur ba kyrteng hartali ,,60-70% ki nongshongshnnong ki dei na Bangladesh..

Leave a Reply

Submit Comment

*