Shillong, Nailar 10: Ka North-eastern Railway Frontier ryngkat ka Sorkar Jylla ka la iaid shaid shaid sha khmat ban pyndep noh ia ka railway project ha Meghalaya. Naduh ki snem ba la dep la iohsngew shibun ki jingpyrshah ia ka railway haka nongrim ba ka jingwan jong ka rel kan nangplie lad ia ka influx.
U myntri rangbah ka jylla u la kular ban wanrah ia ki ain ki ba khlain ban khanglad ia ka jingrung kyrthep ki mynder shwa ban iaid sha khmat ia kane ka project, ka la long tang ki kyntien pynbiej ia u paidbah, namar haduh mynta ngim pat iohi ia kita ki ain ki ba khlain, hynrei ka railway project ka la iaid shaid shaid shakhmat, imat kane ka sorkar kam kwah ban iada na ka jingwan rung kyrthep ki briew ba nabar hynrei ka pyrshang ban pynrung kynnoh ka KHNAM
U Myntri rangbah ka jylla bad ki myntri jong u ki long ki ba kloi ban set kyllut ia la ki jong ki skhor bad tap ia la ki jong ki khmat ha kaba ia dei bad ka jingdawa jong ki paidbah, lada dei ka jingdawa jong ki nonghikai skul ia ka hok jong ki, ka jingdawa jong ki contractor ia ka hok jong ki, ka jingdawa jong ki samla pule ia ka bai bam jong ki, ka jingdawa ban wanrah ia ka education policy, employment policy, youth policy, mining policy, water policy bad kiwei kiwei.
Na ka liang jong u Bah Thomas president youth wing jong ka khnam u la kynnoh ba kane ka sorkar kala h kwah dik dik ban pyndep noh ia kane ka railway project ka ba la pyrshah da ki ba bun. Ka jingiakren ban wanrah ia kita ki ain ne ki mechanism ban khanglad ia ka jingwan tuid ki briew ba na bar kala shu iaid mynta la lai lai snem bad kim iohi ba kan poi shano shano ruh.
Na ka liang jong ka KHNAM ka ong ba kam don shuh da kawei ka lynti ne ka ain ban kham khlain ban ia ka ILP ban pyrkhing ia ka jingrung kyrthep jong ki mynder. Ka seng ka pynrem jur ia kane ka jingleh donbor jong ka sorkar bad lada ka sorkar ka kwah ban pyndep noh ia ka railway project, ka KHNAM ka dawa ban wanrah shwa da ka Inner Line Permit ban khanglad ia u mynder bad neh ka jinglong trai jong ngi ki trai ri trai muluk.
