Shillong, Jylliew 13: U Bah Erwin K Syiem Sutnga u wei na ki muktiar kiba la paw ha kane ka nongbah Shillong mynta ka sngi u la thoh sha u Home Minister u Bah HDR Lyngdoh, ha kaba u la ong weng ia ka mynsiem ha nga mei khot ia kren ia ka KSU na ka bynta ka jingbha jong ka jylla baroh kawei.
Ha ka shithi kaba u la thoh sha u myntri kam poh iing u Bah Erwin, u la ong “ Nga thoh ia kane ka shithi da ka jingsngewkhia kaba jur ban ioh ba ka shong suk shong sain kala thuh ha kane ka jylla bad khamtam eh hapoh kane ka nongbah Shillong”.
Ka daw baroh ka mih na ka jingshna ia ka lynti rel ha Byrnihat, hynrei kane kala wanrah pynban ia ka jingia huri hura ha ka jylla bad kane kala ktah ia ki riew paidbah kiba luilui, la ong la iatip baroh ia ka jinghiar jong ka ioh ka kot ha kane ka jylla naduh ba la khang ia ka jingtih ia ki marpoh khyndew.
Kaba sah mynta ban kyntiew ia ka ioh ka kot dei sa tang ki kam jngohkai pyrthei kaba la sdang ban kiew ha kane ka jylla bad kaba la ai kam ai jam ia ki briew khamtam eh ha kane ka nongbah Shillong bad kiwei kiwei ki jaka kiba la shah khlem kam khlem jam.
Hynrei da kane ka jingjia kaba la wan rah ia ka jinghuri hura ha ka jylla, ka jingiapynibor ha pdeng ka sorkar jylla bad ka seng KSU kala ktah shibun ia ka shong suk shong sain bad kaba kala kham pynher syrngiew pat ka long ka jingkren jong ka seng lehnoh kaba la niew beain da ka sorkar kala dang pynsniew dur shuh shuh ia ka jingshong suk.
Na ka liang jong u Bah Erwin, u la ong ba ka sorkar kam dei ban shim stieng ia kane, ka sorkar ka la dei ban khot ia kren ia ka KSU da kaba buh noh sha dien ia ka mynsiem jingsngew ha nga mei na ka bynta ka jingmyntoi jong u ba bun ba lang. Ia kane ka phang la dei ban ia kren ban dup lah ban weng ia kane ka jingeh kaba sah mynta ha ka jyrwit jyrwat.
U Bah Erwin u la ong ba kane baroh ka shong ha ka jingstad jong u myntri kam poh iing ban leh shuwa ba ka shong suk shongsain kan dang sniew shuh shuh, u la ong ba u thoh ia kane ka long na ka bynta ka jingbha u ba bun ba lang bad kan long ka jingpruid dak ruh ia kiwei ki paidbah nongshong shnong ba kin mih sha khmat ban kren halor kane ka bynta, la ong u bah Erwin K Syiem Sutnga Muktiar ha ka shithi sha u myntri kam poh iing,
