New Delhi, Naitung 02: Da ka jingthmu ban weng ia baroh ki jingeh ha ka jingtest, ka Preeti Sudan, Health Secretary bad Dr Balram Bhargava, DG (ICMR) mynta ka sngi ki lah kyntu ia ki Jylla bad Ut ban shim ia ki sienjam ba mardor ban iarap bad pynkhlain ia ka jingtest. Ki la bteng ban ong ba ka ‘‘test-track-treat’ kalong ka rukom treikam kaba kongsan ban lap kloi bad tehlakam ia ka khlam COVID-19.
Da kaba kdew ba ha ki katto katne ki Jylla bad UT, ka jinglah test, ka jingpyndonkam ia ki jaka test, khamtam ia kito kiba pyniaid da ki riew shimet mynta ka long kaba duna bha, kumta lah ai jingmut ia ki Jylla/ UT ban shim baroh ki sienjam ba pynthikna ka jingpyndonkam pura ia baroh ki jaka test COVID-19 ha ka Jylla/UT.
Lah ai jingmut ia ki Jylla/ UT ban iarap kloi katba lah ha ka jingtest da kaba pynlah ia baroh ki nongsumar nongpang, ba kynthup ki nongsumar nongpang shimet, ban ai jingmut ia ka COVID test sha kino kino ki briew da kaba pyndep ia ka jingdonkam na ka bynta ka jingtest katkum ki jingbthah jong ka ICMR.
Ka ICMR ka lah ai jingmut ba ki jaka test kidei ban long kiba laitluid ban test ia kino kino ki briew katkum ki jingbthah jong ka ICMR bad ki bor ba dei khmih ha ka Jylla kim dei ban pyrkhing ia ki briew na ka jingphah test, namar ka jingtest kloi kan iarap ban tehlakam ia u khniang jingpang bad kan pyllait ia ki jingim.
Katba ka RT- PCR kadei ka rukom test kaba biang tam na ka bynta ka jingpang COVID-19, ka ICMR dang shen ka lah mynjur ia ka jingpyndonkam ia ka point- of- care Rapid Antigen Test na ka bynta ban lap kloi ia ka COVID-19.
Ka jingtest kalong kaba sted, kaba suk, kaba shngain bad lah ban pyndonkam kum ka point- of- care- test ha ki containment zone kumjuh ruh ki hospital, katkum ka jingdonkam ba lah kdew da ka ICMR na ka bynta ka jingtest. Ka ICMR ka dang peit ia ka jingbiang jong kum kine ki kit ban kyntiew ia ka jingdon kiwei kiwei ki lad na ka bynta ki nongshong shnong .
Ka ICMR haduh mynta ka lah ai ka jingmynjur baroh 1,056 tylli ki jaka test ban test ia ka COVID-19. Na kane, 764 tylli ki jaka test kidei ha ka jaka ba pyniaid da ka Sorkar bad 292 kidei ha ki jaka ba pyniaid da ki kynhun shimet.
Khnang ban pyniaid beit iaid ryntih ia ka jingtest, lah ai jingmut ia ki Jylla/UT ban sdang ia ki sienjam ha kaba iadei bad ka ‘campaign mode’ da kaba plié ia ki camp/ da kaba pyndonkam ia ki mobile van ha ki jaka ba kynrei ban lum ia ki sample jong baroh ki briew ki bym paw dak jingpang kumjuh ruh kiba iakynduh bad ki, bad ban test ia kito ki sample da kaba pyndonkam ia k rapid antigen test.
La ki briew kiba long positive ne kiba ioh ia kane ka jingpang dei ban sumar katkum ka kyndon jingsumar ba lah buh bad ia ki briew kiba long negative dei ban test da ka RT-PCR. Kumjuh ruh, ka jingbuh dor na ka bynta ka RT-PCR test da ki jaka test shimet dei ban rai da ki Jylla/UT.
Lah ai jingmut shuh shuh ban pynlong kongsan ia baroh ki jaka test ban ai jingtip halor ki test ha ka database jong ka ICMR bad ki bor jong ka Jylla, ka distrik bad ka shnong khnang ba kin lah ban peit bad wad ia kito kiba don jingiadei bad ki nongpang
Ha kaba iadei bad ka jingpynkhlain bad pyniaid ryntih ia ka jingtest, la kyntu ia ki Jylla/UT ban phaikhmat sha ka ‘jingwad ia kiba don jingiadei bad ki nongpang’ namar kalong kaba kongsan ban tehlakam ia u khniang jingpang. La bthah ia ki Jylla ban long kiba peitngor bha bad ban bteng ban shim baroh ki sienjam na ka bynta ka jingbit jingbiang ban tehlakam ia ka COVID-19.
