New Delhi, Nohprah 21: Ha ka jingiatreilang kaba jan hapdeng ki kynhun lum jingtip bad ka tnat Information & Broadcasting, ka tnat ha ka sngi nyngkong ka la hukum ban block ia 20 tylli ki channel YouTube bad 2 tylli ki website kiba pynsaphriang ia ki khubor ha ka internet kiba long pyrshah ia ka ri India.
Ia kane la leh lyngba ar tylli ki hukum – kawei na ka bynta 20 tylli ki YouTube channel ia kaba ka la bthah ia ka YouTube, bad kawei pat ka hukum na ka bynta 2 tylli ki website ha kaba ka la kyntu ia ka tnat Telecom ban phah ia ki nongai internet ba kin block ia kine ki rynsan.
Kine ki channel bad ki website ki dei jong ka rynsan pathai khubor hamsaia kiba treikam na Pakistan bad kiba pynsaphriang ia kum kine ki khubor shaphang katto katne ki kam ba kongsan kiba iadei bad ka India.
Ia kine ki channel la pyndonkam ban pynmih ia ki prokram kiba pynshlur ia ka jingiaphiah jong ka ri kiba iadei bad ka Kashmir, ki kynhun shipai jong ka ri, ki jaitbynriewriewrit paid jong ka India, ka Ram Mandir, u General BipinRawat bad kiwei kiwei.
Ka rukom treikam jong kane ka jingpynsaphriang ia ki khubor pyrshah ia ka India ki long ha ka rukom kaba iadei bad ka The Naya Pakistan Group (NPG), kaba treikam na Pakistan, kaba don ia ka network ha ki channel YouTube bad kiwei kiwei ki channel ka YouTube ki bym iadei bad ka NPG.
Kine ki channel ki don 35 lak ngut ki nongbud bad ki jingpeit ia ki video ha kine ki channel ki la kot sha ka 55 klur. Don katto katne ki channel jong ka NayaPakistan Group (NPG) ia kiba la pyntreikam da ki nongpathai khubor kiba na ki rynsan pathai khubor jong ka Pakistan.
Kine ki YouTube channel ki la pynmih ruh ia ki prokram kiba iadei bad ka jingiakhih ki nongrep, ki jingiakhih kiba iadei bad ka Citizenship (Amendment) Act bad ki lapyrshang ban pynshit ia ki jaitbynriew rit paid ba kin iakhih pyrshah ia ka Sorkar India. Ka la don ruh ka jingsuba ba ka don ka lad ban pyndonkam ia kine ki YouTube channel ban pynkulmar ia ka jingpynlong ia ki elekshon ha 5 tylli ki jylla.
Ka tnat ka la shim ia ki sienjam ban wanrah ia ka jingshngain ha ki lad ai jingtip jong ka ri bad ka la pyntreikam ia ki bor hapoh ka Rule 16 jong ka Information Technology (Intermediary Guidelines and Digital Media Ethics Code) Rules, 2021.
Ka tnat ka la iohi ba bun na ki khubor ki dei kiba iadei bad ki kam kiba don jingma ia ka shongsukshongsain ha ka ri bad ba ki dei ruh kiba ialam bakla. Bun na kine ki dei kiba la pyllait na Pakistan kum ka jingai jingtip ba bakla (kumba long ha kaba iadei bad ka Naya Pakistan Group) pyrshah ia ka India bad kumta ka la long kaba donkam ban shim ia ki ki sienjam ban block noh ia kine.
