Shillong, Nailur 08: U Bah Embhahlang Syiemlieh, MLA, Chief Adviser Ka Physical Culture & Sports Foundation ka Mawlai u ai khublei kyrpang ia ki ar ngut ki rang ialehkai Martial Arts ha Ka Kickboxing kiba na Mawlai Iewrynghep ha ka jingjop jong ki ban ioh ka takma ksiar bad rupa lyngba U Khrawbok Marweiñ bad U Albanrilang Pearson Mylliem Umlong.
Dei ha Ka WAKO India Senior National Kickboxing 2016 kaba la long naduh 3 tarik haduh 7 Nailar 2016 kaba la long ha Swarna Bharathi Indoor Stadium Visakhapatnam ba U Khrawbok Marweiñ u la ioh ban khur takma Ksiar ha Ka Ring Sports (Low Kick) below 51 kg, katba U Albanrilang Pearson Mylliem Umlong u la ioh ban khur takma rupa ha Ka Ring Sports (K-1 Rules) below 51 kg.
U Bah Embhahlang Syiemlieh kum U Chief Adviser kane ka Synjuk Ialehkai ha Mawlai u la ai ka jingiaroh kaba Khraw namar hadpeng ki jingeh kiba bun ba ki hap ban mad ha baroh ki liang la ka long ha ki tiar ialehkai, jaka ialehkai bad ka bai leit bai wan nalade baroh, hynrei ki la lah ban trei minot bad shitom ban wanrah burom ia Ka Jylla Meghalaya, ia Ka East Khasi Hills District bad khamtam ia Ka shnong Mawlai baroh kawei.
Kine ki nongialehkai kin poi ha Mawlai ha ka por shiteng sngi eiei ha ka 10 tarik Nailar 2016. Kine baroh arngut ki dei kiba la ioh pyndonburom mynshem snem da U MLA ka Mawlai haba ki la wanrah takma rnong ha kum kine ki juh ki jingialehkai ha Ka National bad Regional Levels. Ka Physical Culture & Sports Foundation of Mawlai ka ai khublei kyrpang ruh ia Ka FKJGP Mawlai Circle kaba la noh synñiang ban kyrshan ia kine ki nongialehkai na Mawlai ha ki snem ba la dep.
Kane ka la long ka jingaibor bad ai mynsiem ba kin nang kiew shaphrang hapdeng ki jingialeh kiba bun. Ka jingaikhublei ka leit ruh sha Ka Synjuk Samla Mawlai Iewrynghep bad Rangbah Shnong kiba la kdup bad ai jaka ialehkai man la ka sngi ia ki ha Community Hall.
