Shillong, Risaw 10: U Working president jong ka UDP u Dr Jemino Mawthoh ha ka jingialang paidbah jong ka party UDP, ha pynursla u la pynbna paidbah ba u Bah Joe Marwein president jong ka seng FKJGP yn sa pyniasoh noh bad ka seng UDP namar ka por trei kam hapoh jong ka seng kan sa kut noh shen.
Ha kane ka jingialang jong ka UDP ha Pynursla u la ong ba ka seng Congress ka don tang u wei u nongialam bad u ta u dei u Dr Mukul Sangma, bad ym juh iohi ia ki MLA congress na ki lum khasi ba kin kren ei ei pyrshah ia u Dr Mukul, u leh “lada u ong kaba lieh kaba lieh, kaba iong kaba iong, lada ngi peit sha ka congress la shuh shah bthah ha u wei u briew, lada ngi peit sha kiwei ki party ruh kum juh”.
Haba ia dei bad ka jingpynrshang ban pynkhyllem ia ka sorkar ka long kaba eh namar ba ki don tang phrangut ki MLA wat la kila pyrshang la ar sien. Ha kane ka kynti kaba mynta ka UDP ka kwah ban jop bun ki MLA ba kin ioh ban ialam ia ka sorkar ha u snem 2018.
Hapoh ka jingialam jong ka seng Congress ka jylla kam don pisa shuh, ka PWD kam pat siew ia ka bill kontrator kala kala poi la jan T.500 klur bad bun na ki kontrator kim treh trei shuh, la ong ruh bun kiwei ki tnad sorkar ba ki ruh ki ia kynduh ka juh ka jingeh bym don pisa.
Haba ia dei bad ka light, kum ka party ha u snem 2014 kila pynlong ia ka jingiashong kyllain mungor ban pynpaw ia ka jingpyrshah namar ka MeECL kala kit ram sha ka NEPCO kala kit ram T.476 klur ha katei ka por bad mynta ka MeECL kala kitram biang T.707 klur sha ka NEPCO.
Ha kane ka jingkren paidbah, ong ba “Na ka liang jong ka UDP ka pynkhreh biang ban ia lum paidbah biang ban pynpaw ia ka jingsngew pyrshah ka jong ngi” la ong u Dr Jemino Mawthoh.
