Shillong, Lber 04: Ka myntri ba dei peit ia ka rep ka riang ka Dr. M.Ampareen Lyngdoh haba jubab ia ka jingkylli jong u Rupa Marak ka la ong ba ka dei ka jingshisha ba ka dieng kwai ki la iap tram bad kane ka la ktah shisha ia ki nongrep kwai ha ka jylla.
Na ka liang ka tnad rep soh rep pai kala iatrei ryngkat bad ka ICAR, KVKs, MBMA bad ki stad wad bniah na ka CTCRI kaba don ha Assam bad Kerela. Dei halor ka jingai jingmut jong kitei ki artylli ka sorkar kala pynmih ia ki kot lyngkdop ha ka ktien Khasi bad Garo ban pynsngewthuh kumno ban sumar ia ki dieng kwai.
Haba jubab ia kiwei pat ki jingkylli haba iadei bad ka jingiap tram ki dieng kwai ka myntri ka tnad rep kala iathuh hapoh ka iing dorbar ba ka jingiap tram ki dieng kwai kam dei tang hapoh jong ka Dadenggre bad Rongram Blocks, hynrei kane ka jingiap tram kala ktah ia ki phra tylli ki district ha ka jylla bad ka jingpynmih ia u kwai kala hiar sa 10%.
Ia ka daw jong ka jingiap tram ym lah ban kdew tang ia kawei ka daw, hynrei lah ban don bun ki daw ha kaba ka sorkar ka dang ialeh pyrshah da kaba wad ia ki lad ki lynti ban iada na kane ka jingiap tram.Ka sorkar ka ai jingiarap ia kiba rep kwai kiba la shah ktah ha kane ka jingiap tram ha kaba ki nongrep ki lah ban register ia lade hapoh ka website ka tnad rep.
