Nongspung, Jymmang 31: Ka Village Defence Party, Nongspung hapoh ka jingialam u Bah Melanding Syiemlieh President bad u Bah Rojimstar Syiemlieh Secretary ha ka jingiasnohktilang ka Seng Samla, Seng Longkmie ka shnong Nongspung bad ki samla pule na ka Social Work Department ka Martin Luther Christian University ha ka 29tarik u Jymmang, 2019 ka la pynlong ia ka prokram ai jinghikai halor ka jinglehkhuid, ka jingjyllei ki jingdih kiba pynbuaid, ka jingshongkha khynnah bad ka jingthombor ia ki.
Haba kren ha ka jingialang u Bah Kyntiew Syiemiong Secretary ka shnong Nongspung u la ong ba ka jinglehkhuid ka long kaba donkam haduh katta katta kum ka imlang sahlang ban jinglait na ki jingpang ba bun jait namar ki jingjaboh. Dei ban kiar na ka jingbret pathar ia ki jaboh kum ki plastik bad kiwei kiwei kiba tuid ha ki nala, ki wah ,ha ki lynti syngkien bad ban don ka jingkitkhlieh ban pynlong ia ka imlang sahlang kaba khuid ha baroh ki liang da kaba sdang na la ki rympei iing.
U Bah F. Dkhar na ka Manbha Foundation u la kren halor ka jingshahktah kito kiba lah kyrni ha ki jingdih kiba pynbuaid kum ka kyiad, u drok bad kiwei kiwei kiba buh jingeh ia ki ban bthat ne lait na kum kita ki jingkyrni kiba ktah ia ka koit ka khiah, ka pyrkhat pyrdain , shongsuk shongsain ha iing ha sem bad ha ka imlang sahlang. Ka long kaba donkam ba kum ka imlang sahlang khamtam ki samla ban kiar na kitei ki kynja jingdih namar ba shisien ba lah kyrni ka shem shitom ban lait na ki .
U Bah A. Shanpru uba mihkhmat na ka Sohiong Police Outpost u kren halor ka shongkha khynnah kiba khlem pat dei ka rta ba ka don ka ain kaba teh ia kito kiba shongkha khynnah. . U pynkynmaw ba ki kynthei ki dei ban kynjoh 18snem bad ki shynrang 21snem ka rta ha ka shongkha shongman . Ka shongkha khynnah ka wanrah ia ka jingkulmar ,jingiapher jingmut shiteng por, ka jingduh ia ka jingpule, ka jingktah ia ka koit ka khiah jong ki bad ia ka lawei ka jaidbynriew namar ki khynnah skul bad samla pule ki dei ki nongkynti ia ka imlang sahlang .
U pynpaw ruh ia ka jingshah ktah ki khynnah kiba ngat ha ka jingshah thombor ha ka pyrkhat pyrdain bad ka lawei jong ki. U pynkynmaw ruh ka jingthombor ia ki khynnah kynthei kiba khlem pat dei ka rta ban shongkha kin hap ka jingshah pynshitom ha ka ain Prevention of Children from Sexual Offences Act, 2012.
U Bah Rojimstar Syiemlieh uba pyniaid ia ka jingialang ha katei ka sngi u la kyntu ia ki paidbah nongshong shnong ka thain ban shimkhia bad pylleit jingmut halor kitei ki jingai jingmut kiba pher bapher ki ban tei ia ka imlang sahlang ha ka jingim briew na bynta ka jingshngain, ka jingkiew shaphrang bad shibun ki jingmyntoi. La ioh ruh ia ka jingkren na kiwei kiwei .
