Shillong, Kyllalyngkot 28: U Lat jong ka jylla Assam u ba dei peit ruh ia ka jylla Meghalaya u Banwarilal Purohit haba kren ha ki nongthoh khubor ha dien ba la dep bam shim ia ka jingsmai kum u Lat jong ka jylla, u la ong ba “ Ai ka ain kan leh ia kaba don kam”.
Haba ki nongthoh khubor kila kylli kaei kaba u don ban ong, u la ong ba ngam tip ei ei ruh em, “nga ruh nga shu pule ha ki lad pathai khubor, ai ka ain kan leh ia kaba don kam, ka jingkwah jong ka long ban iohi ia ka roi ka par jong ka jylla Meghalaya.
Ia u Lat jong ka jylla Assam u Banwarilal Purohit, la pynsmai ia u ban long u Lat jong ka jylla Meghalaya ruh da u Justice Dinesh Maheshwari, Chief Justice, High Court jong ka jylla Meghalaya, ha Raj Bhavan, Shillong mynta ka sngi.
Na ka liang jong ka sorkar kiba la ia don lang ha kane ka sngi ki long u myntri rangbah ka jylla u Dr Mukul Sangma, u Deputy Chief Minister, Prof. R. C. Laloo, Home Minister, u Bah H.D.R. Lyngdoh, Health and Family Welfare Minister, Kong Roshan Warjri, Ka Blubell Sangma MLA, u Chief Secretary, u K.S. Kropha, ki heh sorkar bad kum juh na kaliang jong ki heh shipai suin bad ki heh shipai ryngkew kila ia don lang.
