Shillong, Kyllalyngkot 28: U Bah Shibun Lyngdoh President jong ka BJP Meghalaya State Unit u la ong ba kum ka party na kane ka jylla kala dep thoh sha ki nongialam jong ka party ha Delhi ba ki dawa ba ia ka kynhun tohkit ban tohkit ia kane ka jingshah kynnoh u Lat ba rim ka jylla u V Shanmuganathan dei ban thung da ka ophis jong u president jong ka Ri India.
Kum ka party ka kwah ban ioh ba ka jingtohkit kam long kaba laid luid dei na kane ka daw ba ki dawa ba dei ban thung ia ka kynhun tohkit na ka ophis jong u president jong ka Ri India la ka dei kano kano ka kynhun tohkit ban lap ia ki jingshiaha baroh bad ban pynshitom ia kiba don kti ha kane ka kam.
La dei ba u Lat ba rim jong ka jylla u la leh ia kane kam kumba la kynnoh ruh dei ban pynshitom tyngeh katkum ka ain bad lada ka long kaba ka dei tang ka jingpharep ruh dei ban pynshitom ia kiba don kti ha kane ka kam ban ia shai ha khmat jong ki paidbah jong kane ka jylla.
U Bah Shibun u la ong ba kum ka party ki la dep ban phah da ka jingthoh ha kaba ia dei bad kane ka jingsngew jong ka party na kane ka jylla Meghalaya namar kane ka jingshah kynnoh ka long kaba sngewsih ban iohi ba kum kane ka jingjia kan jia ha kane ka jylla. Ai ka ain kan pynshitom ia ia kiba dei ban pynshitom.
