Shillong, Naitung 20: Ka All Meghalaya School Parents Association (AMSPA) ka ai khublei kitbok kitrwiang ia ki Khynnah samla kiba la wan shakhmat ha kane ka eksam Higher Secondary School Leaving Certificate (HSSLC) kumjuh ruh ia kito ki khynnah samla kiba la pass bha bad wan shakhmat ha ka eksam Secondary School Leaving Certificate (SSLC) Examination jong une u snem 2020, kumba la iatiplang baroh ba kadei kaba dang shu dep dangshen da ka MBOSE bad CBSE.
Ka AMSPA lyngba u Samla Banshai Marbaniang uba long u President jong kane ka Seng ka la ai ka jingiaroh bad khublei kyrpang ia ki samla baroh kiba la lah da shisha ban wanrah ia ka nam bad ka burom hala kajong ka ïing ka sem kumjuh lem wat ia la kajong ka Ri bad ka Jaidbynriew hi baroh kawei.
Ka AMSPA ka la ong ruh ba kito ki khynnah kiba la wan shakhmat ha kaba khlem da jer kyrteng manla iwei pa iwei kalong ka lynti kaban plie lad ia kiwei pat kiban sa dang iakhun ha kiwei pat ki snem kiban dang wan khlem da don ka jingsheptieng ne salia na bynta ka hok bad ka jingshisha lyngba ka jing iaiminot bad treishitom.
Ka Seng ka sngew ban ong ba watla kito ki khynnah pule ki bym shymla lah ban poi sha ka thong jongka jingjop kimdei ban duh mynsiem noh tang mynta hynrei kum ki Kmie ki Kpa kiba don hapoh ka Seng ne wat ki bymdon lang ruh kumjuh ngin dang iai ai mynsiem na kapor sha kapor ba to ai ba phinlong kita ki Khynnah kiba iai minot bad trei shitom khlem jingsalia na bynta ban ioh kheit ia u soh jongka jingtrei shitom ha kiwei pat ki por bad ki snem kiban dang wan na bynta ban ioh lad ha kaban wanrah ia ka burom kumba long lem kiwei ruh kumjuh.
Ka Seng ka buh ka jingduwai kaba kyrpang na bynta ia baroh ba “To ai ba U Blei Trai Kynrad Nongbuh Nongthaw un ym iehnoh beiñ iaphi sha lyndet, hynrei to ai ba undang iai btin lynti bad kyrkhu kyrdoh iaphi baroh na bynta kiwei pat kipor kiban dangwan”, la ong u Bah Banshai Marbaniang president ha ka kyrwoh kaba la phah mynta ka sngi.
