Jowai, Nailur 13: Ka Dorbar Shnong ka Shnong Myngsngat kala kynthoh tyngeh iaka JHADC hapoh ka jingialam u CEM ma Thombor shiwat, namar ba kala pyndonkam bakla iala ka bor bad pynkhein iaka Ain ba iadei bad ki Waheh Shnong katkum ka “The Jaintia Hills Autonomous District (Establishment of Elaka and Village and Election, Appointment, Powers, Function and Jurisdiction of Dolloi bad Sirdar and Waheh Shnong) Act 2015” ba la ioh ka jingmynjur na u Lat ka jylla ha ka 23 december 2015.
Kane ka jingpyndonkam bakla jong ka JHADC ia ka bor jongka, ka dei ka jingbym ai sanad ia u Waheh Shnong jongka Shnong Mynsngat hadien bala dep ban jied ia u haka 20 April 2016 da kaba ia thep vote lyngba ki secret ballot ba la pyniaid da u Agent/Representative jong u Dolloi ka Elaka Nartiang, kaba la long katkum ka section 23 (3) jong katei ka ain bala kdew haneng. Ha kane ka jingiathep vote la don hynriew ngut kiba ia khun ia ka kam waheh shnong bad ia ka jingjop la ioh da u Phresmi Suting.
Ha ka juh ka sngi hadien ba la dep jied waheh shnong bad ladep ban pynbna paidbah ia u nongjop, u Agent lane Representative u Dolloi u la tyrwa ia ka samoi treikam jong u Waheh shnong sha ki paidbah, kata katno snem ban long waheh shnong bad ki paidbah baroh ki la jubab daka jingmonjur lang na ka bynta lai snem khlem ka jingpyrshah na uno uno ne kano kano ka briew. Kumta u Dolloi u la ai ia ka Confirmation na ka bynta lai snem katkum ka section 26 jong ka ain bala kdew haneng.
Ha ka Dorbar paidbah lane ka Dorbar Shnong kaba la long ha ka 26 Iaiong 2016, la jied ia ki nong kitkam shnong (Executive Body) katkum ka Section 22 jongka ain ka JHADC bad la pynskhem ia ka samoi treikam jongki na ka bynta lai snem, khlem kano kano ka jingpyrshah na kano kano ka liang ne ki riew shimet.
Hynrei ha ka 23 Jymmang 2016, ki khatwei ngut ki briew ba la kam ialade kum ki Chairman bad secretary dong ki la phah shithi sha ka Administrative Officer (AO) JHADC, bad ha kane ka shithi ki la kyrpad ia ka Administrative Officer ban pynioh sanad ia u waheh shnong thymmai U Phresmi Suting tang shisnem.
Kine ki briew ki la phah shithi khlem ka jingialang paidbah ha ki dong ba ki don bad ym tang katta hynrei ki la pyndonkam bakla ruh wat ia ki seal jongki dong khlem ka jingmonjur ne jingtip lang ki paidbah. Na ka liang ka AO ka la shim ba kane ka shithi kabym don nongrim eiei ruh em kaba ka la ioh pdiang, kum ka jingujor. Bad hadien kane ka AO ka la khot ia baroh arliang bad kumjuh ia u Dolloi Nartiang ha office jong ka haka 10 August 2016.
Ha kane ka sngi na ka liang u Representative jong u Dolloi u la kren shai ba ka samoi trei kam jong u waheh shnong ka shnong Mynsngat na ka bynta lai snem la ai katkum ka jingmonjur jong ki paidbah jong ka shnong bad ym lah ban pynduna ne tam ia kane. Hadien kane ka jingsamon ba la khot da ka AO, ka office ka khlem ai ia kano kano ka rai ba shai halor ka sanad.
Na ka liang ka Executive Body jong ka shnong Mynsngat ka la shim ba kane ka jingbymai sanad ia u waheh shnong naduh kine ki sngi, ka don kaei re kaei ka jingmut ba sniew sha lyndet, ne lah ban ong ba dei tang ka jingkwah leh politic jong u CEM bad u wei na ki EM ba dei ruh u waheh shnong barim jong ka shnong Mynsngat ha ki snem baladep.
Kumta na ka liang ka Dorbar Shnong haka 12 tarik mynta u bnai kala ia kynduh biang ia bad ai daka jingthoh ban dawa jur naka JHADC ba kadei beit ban ai sanad ia u waheh shnong U Phresmi Suting ia uba la dep ban jied bad pynjop donburom da ki paidbah da kaba iathep vote, kaba long katkum ka riti synshar jong ka Ri India lane katkum ba la bthah da ka ain jong ka JHADC.
Lyngba ka jingthoh la dawa jur na ka JHADC ban pynioh sanad hapoh 26 September 2016, lym kumta ka shnong baroh kawei kan iaid da ka jingiakhih paidbah lane wat ban kiew iinglieh iingsaw khnang ban ioh iala ka hok, namar ka JHADC ka la pyntroin bad iuhroit ia ka riti dustur jong u Khasi Pnar ba la sain dur naduh ki Longshuwa Manshuwa.
