Shillong, Rymphang 09: U MLA ka BJP na 19 South Shillong u Bah Sanbor Shullai da ka jingsngewkhia halor ka jingkiew kynsan ka khajna bai jaka kaba la ktah jur ïa ka thaiñ Cantonment, Shillong u la leit ban ia kynduh ia u Sanjay Seth uba dei u Myntri kam pohiing jong ka sorkar India.
Ia kane ka kynhun jong u Bah Sanbor la synran lang ruh da u State President jong ka BJP Meghalaya u president ka jylla u Rikman G Momin bad kiwei kiwei ki nongïalam ba rangbah jong ka party ki la ïakynduh ïa u myntri kam pohiing ka sorkar pdeng u Sanjay Seth ha ka 29 tarik u Kyllalyngkot.
Ha ka jingiakynduh u Bah Sanbor Shullai u la kyrpad ïa ka Shillong Cantonment Board, kaba hap hapoh ka Directorate General of Defence Estate, ba kan thaw ïa ka jingtohkit ban peit bniah ïa ka rukom pynkiew ïa ka STR ha u snem 2009, kaba long ka jingpynkheiñ ïa ka kyndon ba la buh ha u snem 1937 CLAR .
U Bah Sanbor Shullai u la pynpaw ba ka jingïakhun ban ïoh ïa ka hok kan ïai bteng haduh ban da pynbeit ïa kane ka kam ha ka liang jong ki nongshong shnong.
Ka kynhun kala ïakynduh ruh ïa u Director General ka DGDE u G.S Rajeswaran bad pynpaw ruh ba ka don ka jingkyrmen kaba khraw ba ïa kane ka kam yn sa lah ban pynbeit kham kloi.
U Bah Shullai u la ong ba u lah ban khot ia u myntri kam pohiing ka sorkar pdeng ha u bnai Risaw namar ba u myntri u la pynpaw ia ka jingangnud kaba khraw ban wan jngoh ia ka nongbah Shillong.
Ka Meghalaya BJP ka thrang ban wad ki lad ki lynti ban weng ia ki jingeh kiba ktah ia ki nongshong shnong ba rit paid, ban pynthikna ba kan ym don kano kano ka jingïapher hapdeng ki nongshong shnong jong ki jaka Municipal bad Cantonment ha kaba ïadei bad ka khajna.
Shuh shuh u Bah Sanbor u la ong, Wat ha ki por ban wan ka Meghalaya BJP kan ialeh pyrshah ia kano kano ka jingbym iahap ha ka khajna, la ka long ha ki jaka municipal ne ki jaka cantonment.
