Shillong, Nohprah 16: U myntri rangbah duh jong ka Ri u Narendra Modi, mynta ka sngi u la sdang ia ka jingialap election na ka bynta ka party BJP ha kane ka jylla Meghalaya na ka bynta ka MLA Election ka ban sa long ha bas dang jong u snem 2018, ha ka jingiadon lang ki myntri jong ka sorkar pdeng.
Ha kane ka jingsdang jong ka BJP ban ia lap elekshon ha kane ka jylla ki paidbah kiba la ia poi na kylleng jong ka jylla Meghalaya ban wan sngap ia u myntri rangbah duh jong ka Ri u kila ia poi da ki phew hajar ngut.
Haba kren ha ka jingialang paidbah kaba la long ha Madan polo mynta ka sngi na ka liang jong u myntri rangbah duh u la ban jur “ Ban wanrah ia ka jingkylla don kam ban shna ia shibun ki surok ban suk ka leit ka wan”
Haba kren ha kaba ia dei bad ka jylla Meghalaya, u la ong ba ha kane ka jylla la dep ban shna ia ki National High Way 80 km bad kaba dang sah mynta ban shna ka long 200 km ha ka jinglut kaba T.5700 klur tyngka.
Haba ia dei bad ki kam jongoh kai pyrthei u la ong ba ka sorkar pdeng ka kwah ba ka jylla Meghalaya kan long ka pdeng jong ki jaka jngohkai pyrthei ban pynurlong ia kane ka sorkar kala dep ban mang pisa T.100 klur tyngka.
Ban pynlong ia ka Shillong Air Port ban lah ban hiar ki eroplane kiba kham heh ka sorkar pdeng kala mang pisa T.180 klur na ka bynta kane ka kad lieng suin ha kane ka jylla.
U myntri rangbah duh jong ka Ri u la kren ruh ba ka jylla Meghalaya ha u snem 2022 kan sa dap 50 snem ha kaba ka National Games kan sa long ha kane ka jylla. Na ka liang jong u myntri rangbah duh u la ong ba ka sorkar pdeng kan kyrshan bor bah na ka bynta kane ka jingialehkai.
Ban kyntiew ia ka ioh ka kot jong ki briew ka sorkar pdeng kala wanrah ia ka ordinance ha kaba ia dei bad ka Forest Act jong u snem 1927 kaba la khanglad ia ka jingia kit ia bah ia u Siej. U la ong ba kane ka thain kan sa ioh ia ka jingmyntoi shibun da kane ka jingleh jong ka sorkar pdeng hakaba mynta ki paidbah kila lah ban die ia u siej sha bar jong kane ka thian.
Ha ka juh ka por u la kdew ruh ia ka jingdon jong u Dewiong, u Mawshun bad kiwei kiwei ki mar poh khydnew ha kane ka jylla. U mytri rangbah duh u la ong ba ka sorkar ka kwah ban iohi ba ha poh jong u bnai Nohprah 2019 baroh ki long iing kin ioh ia ka ding eletrik.
Kiwei kiba la kren ha kane ka jingialang paidbah ki long u Myntri ka tnad jingohkai pyrthei u KJ Alphons, U Bah Shibun Lyngdoh President jong ka BJP Meghalaya state Unit, ha ka jingiadon lang shibun ki nongialam jong ka seng BJP.
