Shillong,Lber 03: Hadien ka jinglap ia ka met ïap jong ka kmie bad i khun na kawei ka wahduid ne ka check dam ha Langtor, Eastern West Khasi Hills District u Superintendent of Police u la pynpaw ba ki pulit kim pat lah ban ong eiei tad haduh ba kin da ioh ia ki sabut.
Haba ia kren bad u SP News Agency u Bah Dangsan Khyriem uba dei u Superintendent of Police u la ong haduh mynta na ka liang ki pulit kim pat lah satia ban ong eiei la kadei ba shah pyniap ne kumno.
“Mynta ka sngi (03/03/2025) dang shu dep ban leh ia ka post mortem ia kine ki ar ngut kiba la khlad noh ha NEIGHRIMS bad ka report kan sa poi ha kine ki 2 ne 3 sngi” ong u SP.
Shuh u SP u la ong, “tad haduh ba ngin da ioh ka report na NEIGHRIMS ngin sa lah ban ong eiei halor ka jingkhlad noh kitei ki ar ngut la kadei ka jingshah pyniaip ne ki shim hi ia la ka jong ka jingim”.
Haba kylli u SP u la iathuh ba na ka liang kiba ha iing jong kine kiba la khlad noh kila iathuh ba ki don ia ki briew kiba suba kiba lah ban donkti, hynrei ka ophis jong ngi pat kan dang ap ia ka report.
Shuh shuh u SP u la iathuh ba naduh ka shi tarik u bnai Lber la ioh ia ka report halor ka jingjah jong ka kmie bad i khun naduh ka por 5:40 janmiet bad ki pulit ki dang ioh pdiang ia ka report halor ka jingjah haduh ka por 10: 40 mynmiet.
Hadien ka jingjah na ka liang jong ka shnong kila ia wad shnong ha ka por janmiet, hynrei ynda ha ka sngi kaba bud mynstep la ioh jingtip ba la lap ia kine ki shi kmie shi khun na kawei ka wahduid ne check dam.
U Bah Dangsan uba dei u SP u la iathuh ba hadien ba la ioh jingtip ka ophis kala pyntip sha ka tnad crime scene unit bad ka foreign seek bad ynda la poi ma ki sa lah ban sei ia ka met kine ki shi kmie shi khun.
“Hadien ba la sei ia met jong ki la rah noh sha Tirot Sing Civil Hospital Mairang bad ynda la poi hapoh Civil Hospital Mairang kim shym la lah ban leh ia ka post mortem kumta la rah noh ia ki sha NEIGHRIMS ban leh ia kaba donkam” ong u SP.
