Shillong, Lber 26: U bah Michel Wankhar EM ba dei peit ia ka khyndew ka shyuao hapoh jong ka KHADC haba jubab ia ka mat ia ka kren kaba la wanrah da u Bah Gabriel Wahlang mynta ka sngi hapoh iing dorbar, u la ong ba ka kam khyndew kam shyuaiap ka long kaba kongsan haduh katta katta.
U la ong ba ka rukom bat khyndew ha kane ka Ri Khasi ka iapher na kiwei ki bynta jong ka Ri India, dei na kane ka daw ba ka sorkar Meghalaya ha u snem 1973 kala thaw ia ka committee ban pyneit ia ka rukom bat khyndew ia kaba la tip kum ka “Land Reform” ha kaba u Bah T Rymbai u long u lamgphang ia kane ka Committee kaba u Bah DD Lapang u longu dkhot bad kiwei kiwei.
Haba ia dei bad kane ka kam bat khyndew na ka liang jong u EM ba dei peit ia kane ka kam u la iathuh hapoh ka iing dorbar ba la thaw ia ka committee ha kaba u long u lamphang bad kiwei ki dkhot bad ha kane ka sngi la pynbna ruh hapoh ka iing dorbar ba u MDC jong ka Nongstoin ruh yn don lang ha kane ka Committee.
Hana wan rah ia kane ka mat ia kren na ka liang jong u Bah Gabriel MDC jong ka Nongstoin u la ong ba ki phareng naduh u snem 1829 haduh ba kin da leit ha u snem 1947 ki da burom ia ka rukom bat khyndew, ha u snem 1929 ka National Dorbar kala shna bun ki ain ha kaba ia dei bad ka khyndew ka shyiap, hynrei hadien ba la wan ka District Council ha u snem 1952 ka rukom bat khyndew kala nang synjor.
La kdew ba ka ain kaba la shna ha u snem 2014 ia kaba la pynphai noh da u Lat jong ka jylla kam pat biang la don kam ban dang pynkhlain ia ka ban lait na ka jingiadei pathar sha ki kompeni. Kiwei kiba la ia shim bynta ha kane ka jingiakren ki long u MDC na Ranbrai, MDC na Mawphlang, MDC na k Nongpoh kine baroh kila kyrshan ia kane ka mat ia kren.
