Shillong, Iaiong 25: Ka sorkar Meghalaya lyngba ka tnad ka koit ka khiah da ka jingiatrei lang bad ka National Health Mission kan pynlong ia ka jingpyndih dawai wih ia baroh ki khynnah ha ka jylla kiba dang hapoh ka 18 snem. Kane ka jingpyndih dawai kan sdang ha ka 27 tarik mynta u bnai bad yn pynkut ha ka 3 tarik jong u bnai Jymmang ha baroh ki District jong ka jylla.
Ia ki khynnah kiba khlem ioh lad ban pyndih ia kane ka dawai wih ha ka 27 tarik mynta u bnai ki lah ban pyndih ha kiwei ki sngi hapoh jong kitei ki sngi kiba la buh. Ia kine ki dawa yn ai ei na ka sorkar na ka bynta ki khynnah kiba dang shisnem haduh 19 snem.
Ia ki khynnah kiba dang shisnem haduh ar snem dei ban pyndih shiteng na u dawai kuli u Albendazole u ba 400 mg bad ia ki khynnah kiba la palat ia ka ar snem dei ban ai baroh u wei u kuli ban ktah.
Naka liang jong ka tnad ka koit ka khiah ka kyntu ia ki kmie ki kpa ba kin wan rah ia ki khun ki kti jong ki ban pyndih ia kane ka dawai wih lada ym pat pyndih dawai ia ki khun ki kti ba kin shim ia kane ka kabu, kane ka long katkum ka jingpyntip jong u Director jong ka Health Services (MCH & FW) ba bat ruh ia ka kam Jt. Mission Director, NHM, Meghalaya, Shillong.
