New Delhi, Nailar 25: Ban tei ka India kaba thymmai ki samla ki dei ban ia shim bynta ha ka sain pyrthei, la ong u myntri ba dei peit ia ki ministry DoNER ha “Youth Parliament” kaba la pynlong da ka Jawahar Navodaya Vidyalaya, Basohli ha Kathua ha ka jylla Jammu bad Kashmir ha kaba u MLA jong kane ka jaka u Jewan Lal Lalhal ruh u la ia don lang.
U myntri ka sorkar pdeng u la ban jur ia kawei ka phang ba dei ban ailad lang ka juh ka kabu ia baroh, ha ka synshar paidbah ki seng sain pyrthei ki dei ban lait na ka jingleh sbun shiliang shilaing bad ka dei ban lait noh na ka jinglong kaba shi iing shisnem khang ba ki riew paidbah bad ki samla kin ioh ban ia shim bynta kaba kyntiew ia ka Ri.
Haba kren ha kane ka jingialang u myntri ka sorkar pdeng u Dr Jitender Sing, u la ong ba ka sain pyrthei ka dei ka dohnud bad ka mynsiem ha ka synsahr paidbah ha ka Ri India bad ka dei ka por ba ki samla kiba don ia ka jingkit khlieh ki dei ban rung sha ka sain pyrthei bad kane kan long ka lad ia ki samla ba kin lah ban saindur ia ka lawei jong ka Ri. U la ai ka jingiaroh ia ki samla pule kiba la ia shim bynta ha kane ka “youth Parliament” kiba la bat ia ka rukom pyniaid.
U kyntu ia baroh ki nongmih khmat ba kin mih na ka jing sngew ba khraw batri haka rukom pyrkhat pyrdain long kiba kloi ban ia shem bad ki paidbah. Namar kumba ka long mynta u reiw paidbah yn nym lah ban phohsniew ban poi sha ka kyrdan kaba ha khliehduh ha ka sian pyrthei, kane ka dei ka rukom pyrkhat ha kane ka synshar paidbah.
Ka por kala poi mynta ha kane ka Ri India kaba thymmai ha kaba ki riew paidbah ki lah mynta ban don ka jingangnud ban poi sha ka kyrdan kaba sha bor ha ka synshar paidbah, kane ka dei bna long ka mynsiem ha ka synshar paidbah.
Ha kane ka Youth Parliament kaba la pynlong da ka Jawahar Navodaya Vidhyalaya (JNV) ha Basohli, Kathua ki samla pule baroh kiba la wan ban ia shim bynta ki long haduh 130 ngut bad kine ki samla pule kiba la wan ki long na JNV Kargil, JNV Baramulla bad Udhampur. Kane ka dei ka bynta ka 22 jong ka Youth Parliament kaba la pyniaid da ka Navodaya Vidhlaya Samiti ,Chandighar da ka jingiatreilang bad ka ministry Parliamentary Affair jong ka sorkar pdeng.
