Shillong, Iaiong 11: Ki samla ki ba la pyndep ia ka Pharmacist ki la mih shakhmat ban pynpaw ka jingbitar halor ka jingbym shimkhia ka tnat ka Koit ka khiah ka sorkar jylla halor ki jingdawa jong ki ban pynmih ia ka Advertisement ban thungkam ha ki jaka ai jingsumar bapher bapher kiba don ka jylla.
Haba kren sha ki nongthoh khubor, ha ka 11 tarik Ïaiong 2025 ha shillong press clubs u samla Emos June Syiemlieh u la kynnoh ba ki don bun tylli ki CHC, PHC bad ki Hospital ki bym don ki Pharmacist hynrei kat haduh kine ki sngi ka sorkar ka la shu thungkam Pharmacist da kiba thung kontrak.
Da kaba kdew ruh ba kum ka kynhun ki la dep pynsngew ruh ha ka myntri ka sorkar jylla kaba khmih ia ka tnat ka koit ka khiah ka kong Ampareen Lyngdoh ban kham pynbun ïa ka lad thungkam na ka bynta ki samla kiba la pyndep ïa ka jingpule Pharmacist.
La ong da kaba seng ïa ki Pharmaceutical Industries hapoh ka jylla bad ban thung ruh ïa ki Pharmacist ha ki District Hospital, ki CHC, ki PHC, bad ki Sub Centre katkum ki kyndon jong ka Indian Public Health Standards (IPH).
Kila pynpaw ruh ba ka long kaba sngewsih namar ba ka tnat ka koit ka khiah k sorkar jylla ka shu pynthame ïa ki samla tang da ki kam Contractual katba ïa ki Permanent Post ka sorkar ka pynmih duna bha.
Ki samla ki la pynpaw ruh ka jingsngewdiaw halor ka jingbym shimkhia ka myntri ka tnat ka koit ka khiah ban khot ïakren ia ki, watla ka la kular ban khot ïakren sani halor ki mat jingdawa ki samla ba la pyndep pule Pharmacist.Ki la ong ba ka sorkar kam dei ban pynbor ïa ki ban shim da kiwei ki sienjam, la ka long ba kin leit sha Iingkashari ne kin pynbun ia ki jingiakhih.
