Shillong, Iaiong, 03: U Additional Chief Secretary ba dei peit ia ka disaster management jong ka jylla u PW Ingty u la iathuh ba ka sorkar kala buh pisa T.20 lak tyngka ha baroh ki Deputy Commissioner jong ki District ba kin dup lah bania iarap kyrkieh ia ki briew ki ba don kam jingiarap lada ka don ka jingshah lynshop ha ka mariang.
La iathuh ba la ioh jingtip ba ka jingshah lynshop ha ka mariang ha kane ka eriong erngit kala jia ha baroh ki District jong ka jylla, ka jingshah pynjulor ki iing ki sem ka rep ka riang bad ki jingri jingdup, hynrei haduh mynta ym pat ioh jingtip ba kan don pat kano kano ka jingjia kaba sngewsih.
La ong ba kane ka jingbuh pisa mar arphew lak bad ki Deputy Commissioner ka long tang ka jingiarap kyrkih lada ka don kano kano ka jingjia kaba sngewsih, lada ka pisa kam dap ki DC ki hap ban phah jingtip sha ka sorkar ban pan shuh ia ka jingdon kam.
Ha kane ka jingshah lynshop ha ka mariang na ki District baroh kaba la shah lynshop eh ka dei ka South West KHasi Hills District, ha kaba tang hapoh jong ka Ranikor Block ki iing kiba la shah pynjulor ki long palat ia ka 1500 tylli.
Na ka liang jong ki Deputy Commissioner jong ki District bapher bapher ki dang pynlong ia ka jingjurip ban lap ia ki iing ki sem kiba la shah pynjulor ha ka mariang ha kane ka jingkhih kyrthep jong u eriong ha ka step sngi u blei.
