Shillong, Rymphang 27: Ka kynhun ki MDC kiba don ha ka liang pyrshah kim shym la thep kyrteng ban tynjuh bor bad ki MDC ka VPP kiba bun paid ha kaba iadei bad ka election ban jied ïa u Chairman bad CEM ba thymmai jong ka Khasi Hills Autonomous District Council.
Kumba la sakhi mynta ka sngi u MDC ka Langkyrdem – Laitkroh u Bah Shemborlang Rynjah u la thep kyrteng ban ïakhun ïa ka shuki Chief Executive Member katba u Bah Strong Kharjana u MDC ka Mawkhar – Pynthorumkhrah u la thep kyrteng ban ïakhun ïa ka shuki Chairman ba thymmai jong ka Council ha u Secretary ka Legislative Wing jong ka KHADC.
Ïa kine ki ar ngut la synran lang ïa ki da ki para MDC jong ka VPP, katba na ka liang ki MDC ka liang pyrshah kim shym la thep kyrteng satia ban ïakhun ia kitei ki ar tylli ki shuki ba ha khllieh duh jong ka council.
Kum ban shu kdew, u Lat ka jylla lyngba ka sorkar kila pynmih ia ka hukum ban pynlong ia ka election ban jied ia u Chairman jong ka Council ha ka por 11 baje mynstep bad hadien ba la ioh ia u Chairman ba thymmai ha ka por 2 baje kin pynlong pat sa ia ka election ban vs jied ia u CEM ba thymmai jong ka KHADC.
Da kane ka jingbym thep kyrteng jong ka liang pyrshah la sngewthuh ba baroh ar tylli ki shuki hapoh KHADC yn sa rah suk ka kynhun ki MDC ka VPP kiban sa ialam ia ka Executive Committee ba thymmai ha KHADC.
Haba ia kren bad ki lad pathai khubor ka MDC jong ka NPP na Nongshken kaba la shah jied ruh ban long kum ka nongialam jong ki MDC ka NPP kala iathuh ba haduh mynta ym shym pat la ia kren eiei mano ban long leader of Opposition ne u nongialam ka liang pyrshah.
