Shillong, Iaiong 26: Ka Seng Hynñiewtrep Achik Natonal Movement (HANM) Women Wings Central Body hadien ba ka la ioh bun ki jingujor na kiba bun kiba lang ba ki don ki shynrang kiba ju mlien ban pynbiej kai ia ki khynthei kiba dang kham khynnah ka rta da ka jingthok jing shukor bad da kaba shu pynbiej ia ki da ka pisa bad ki pynbiej ruh ia ki khynthei ba lui lui da ka jingkular ba kin ia shong hok bad ri hok ia ki hynrei ynda ki la ia shong tang katto katne bnai ynda ki la ngiah ki sa ieh noh bad pynioh khunrei da kaba ioh daw ban kynnoh ba ka dei ka jingleh jong ki kynthei bad lada ki ioh khun ruh kim don ka jingkhlieh na ka bynta ki khun ba ki la pynioh wat tang ban ai ka bai bam khun ruh.
Bun na kum kine ki khynthei kiba lui lui kiba long sohpdung ha kum kine ki kam awria jong ki shynrang ki dei ki ba wan na ka long iing long sem kiba duk ki bym don lad ban leh eiei kiba hap ban shu sngap bad kun tang halade ia ki jingjynjar bad ki jingjaw ummat.
Kum ka seng kaba peit ia ka bha ka miat ia baroh kan iai bud dien ia kum kine ki shynrang awria kiba pynjot ia ka imlang sahlang ki bym don shuh ia ka mynsiem isynei bad leh ia ki khynthei kum kito ki bym don jingim tang na ka jingkwah brai ka doh ki thok ki shukor ia ki khynthei ba dang lui lui da buit poh jong ki khlem da kheiñ shuh ia ka jingim jong ki khynthei.
Ka seng ka mana ruh ia ki khynthei kiba riam khlem akor kiba phong ki jaiñ khlem akor bad ki bym tip shuh ia ka akor ka burom kaba pyni tad dor ia ka long rynieng ki khynthei namar kane ka jingriam khlem akor ka ialam sha ka jingjot.
Kyntang iawai ka seng ka kyntu ia ki kmie ki kpa ba kin teh la kam ia la ki jong ki khun ki kti khynthei bad shynrang bad lada ka seng ka lap ia kum kine ki jait khynthei bad shynrang ha ka jingbud dien jong ka seng kin ym don jingmap iano iano ruh.(SP News)
