Shillong, Nailar 18: Ka Hill Farmers Union (HFU) ka don ka jingkyrmen ba kan don ka jingkiew ha ka jingshalan ia ki mar rep lyngba ka kad khaii khappud jong ka Tamabil (Dawki) sha Bangladesh ryngkat ka jingiatreilang bad ka Meghalaya International Exporters Chamber of Commerce (MIECC).
U president jong ka HFU u bah Commander Shangpliang u la iathuh ba hadien ba ka seng ka la shah khot sngewbha ban iadon lang ha ka sngi ban plie biang ia ka kad khaii khappud Dawki Land Custom Station (LCS), ka seng khlem kyntait ka la leit ban iadon lang ha katei ka sngi da ka jingkmieh lynti ban kyntiew ia ka jingpyniaid iew ia ki mar rep.
U la iathuh ba, lyngba kane ka kad khaii la sngewthuh ba ka jingshalan mar sha Bangladesh kam dei tang ia u maw bad dewiong, hynrei ka dei ruh ban khaii ia ki mar rep, kumta ka seng ka kloi ban iatreilang bad ki exporter kiba don ia ka license.
U bah Shangpliang u la iathuh ba ki nongrep ki la khmih lynti ban ioh ban die ia ki mar rep ha ka dor kaba biang lyngba katei ka kad khaii. U la iathuh ba ha katei ka sngi plie ruh la phah rung nyngkong ia ka trok kaba kit sohsaw bad ka seng ka ai khublei ia ka MIECC kiba pynpaw ia ka jingsbun ban iarap ban pyniaid iew ia ki mar rep.
Ka seng ka ai khublei ruh ia ka sorkar namar hadien 5 bnai ei ei ba la khang ia kane ka kad khaii khappud Dawki la plie biang mynta ka kynti. U la ong ruh ba ka seng ka khmih lynti ban ioh shalan bun jait ki mar rep kum u syieng, sohsaw, piskot bad kiwei kiwei sha Bangladesh.
