Shillong,Nailur 13:ka FKJGP Mawsynram Circle, ka kyntu ia u myntri rangbah ka jylla u Dr Mukul Sangma ba u dei ban leh ei ei ha kane ka dorbar synrai ban kyntiew ia ka Mawsynram C&RD block sha ka Civil Sub-Division kum ba la angnud da ki paidbah kane ka thain la slem bah.
Ha ka juh ka por na ka liang jong ka seng ka kyntu ia u MLA bad MDC jong ka thain u Bah Pynshngaiñ N. Syiem u ba long ruh u CEM jong ka KHADC ba u dei ban wanrah ia ka mat jingiakren hapoh ka iing dorbar ban dawa ia kaei kaba ki paidbah kila angnud bad ia kaba kila kular ha ka por ialap elelction.
Kum ka seng kala pyrshan gban ban ia kynduh ia u ha kine ki sngi hynrei na ka daw jong ka jingbym kam ym shym la lah ban ia kynduh, hynrei kumba ka long ka Mawsynram C&RD Block kala dei ban ioh noh ia ka jingpynkiew kyrdan sha ka Civil Sub-Division.
Kumba ka long ka Mawsynram block ka dei ka wei na ki block kaba la rim bha ha kane ka jylla Meghalaya, hynrei kumba ka long mynta wat ki jingdon kam kiba rit ki paidbah kihap ban leit sha duh Shillong. Ka Mawsynram Block ka hap ban peit haduh 166 tylli ki shnong.
Ban ia nujor bad ki saw tylli ki block kiba ka sorkar kala kyntiew ia ki sha ka kyrdan Civil Sub Division ka long ba ka Mawsynram block kala kham rim ban ia ki, kane ka jingbym lah ban kyntiew ia ka Mawsynram Block sha ka kyrdan Civil Sub Division ka dei ka jingshah leh beain ki paidbah kane ka thain.
La da ka sorkar ka kyntiew ia kane ka block sha ka kyrdan Civil Sub Division kan iarap shibun ia ki paidbah ban pynsuk ha kaba ia dei bad ki kam ki jam jong ki bad ka sorkar, kane kan kyntiew ruh ia ka ioh ka kot jong ki paidbah ha ka liang ka ioh kami oh jam.
Ka seng ka angnud ba lada lah ban kyntiew sha ka Civil Sub Division kan ia rap ia kane ka thain ha baroh ki liang. Ym lah ban len ba ha ka common plat form ba la long ha ki elelction kiba la leit ha u snem 2008 bd 2013 lakren ia kane ban wanrah ia ka Civil Sub Division, u MLA u la dei ban kren ia kane ka kam hapoh Assembly ha kine ki sngi.
Na ka liang jong ka seng ka da kyrpad jur ia ka sorkar jong u Dr Mukul Sangma ba kan pyrkhat lem ban kyntiew ia kane ka Blcok sha ka Civil Sub Division kumba la dawa da ki paidbah na ka por sha ka por. Ki paidbah ka thain ki angnud ban iohi ia ka Civil Sub Division.
