Shillong, Jylliew 
08: Ka party Khun Hynniewtrep National Awakening Movement (KHNAM) mynta ka sngi kala leit ban ai ia ka dorkhas sha ka myntri ba dei peit ia ka tnad Information bad Technology ka Dr Ampareen Lyngdoh, ban dawa ba ka sorkar ka dei ban leh ei ei ha kaba ia dei bad ka jingmang kam ia ki trai jylla hapoh ki company pyniaid mobile kiba don ha ka jyllaMeghalaya.
Ha kane ka jingiakynduh na ka liang jong ka KHNAM kala kdew ba ka jingkyrduh kam mynta kala nangkiew katba dang mih ki sngi bad kane ka long kawei na ki jingeh kiba ka jylla ka iakynduh, hynrei kiba bun na ki company mobile ha kane ka jylla pat kim but ia ki kyndon thung kam katkum ka policy jong ka sorkar jylla.
Na ka liang jong ka KHNAM kala kdew ba baroh ki manager ha ki mobile company ha ka jylla kim dei kiba na kane ka jylla bad kiba bun kidei na kiwei ki jylla bad kane ka khanglad ia ka ioh kam ioh jam jong ki paidbah kane ka jylla kham tam ki samla kiba la pyndep ia ki jingpule ki jong ki.
Na ka liang jong ka KHNAM ruh ka dawa na ka sorkar ba ka dei ban bethah ia ki mobile company ba kin pynrung ia ka ktien khasi ha ka Interactive Voice Respond (IVR) lada ha kiwei ki jylla lah ban leh balei ha kane ka jylla ym lah ban leh, kum ka nuksa ha Assam la leh ha ka ktien Hindi, phareng bad Assamees bad kum juh ruh ha kiwei kiwei ki jylla.
Na ka liang jong ka KHNAM ka la kdew ruh ba bun kiba trei ha ki mobile company ia ka jingsiew ia ka tulop jong ki nongtrei ym shymla siew katkum ki kyndon kiba dei jong ka company hynrei la siew da kawei ka dor. Ka sorkar kala dei ban bethah ia ki company ba lada la siew ia ka tulop jong kiba shim agency ia ka kam kita ki agency ki dei ban long kiba na ka jylla ym kiba na shabar ka jylla bad ha ka juh ka por kim but ruh ia ka dor bai bylla kaba la buh da ka sorkar jylla.
