Shillong, Nailar 25: U nongbbishar ba rangbah duh jong ka High Court jong ka jylla Meghalaya, u Justice Mohammad Yaqoob Mir mynta ka sngi u la pynbam smai ia u Tathagata Roy ha Raj Bhavan, Shillong kum u Lat ba thymmai jong ka jylla Meghalaya.
U Lat ba thymmai jong ka jylla haba shim ia ka jingbam smai mynta ka sngi, ha khmat jong u nongbishar ba rangbah duh jong ka High Court jong ka jylla Meghalaya, u la shim ia ka jingbam smai ha ka kyrteng jong u Blei.
Ia ka shithi thung kam kum u Lat jong ka jylla Meghalaya na u President jong ka Ri India la pule da u Additional Chief Secretary jong ka jylla u Bah Hector Marwein. Ia kane ka sngi la sakhi lang da u myntri rangbah ka jylla u Conrad Sangma, ha ka jingiadon lang ki myntri sorkar, u Bah Metbah Lyngdoh, Bah Hamletson Dohling, Bah Kyrmen Shylla, Bah AL Hek, Bah Samlin Malngiang, u Chairman ka State Planning Board u Bah Lambor Malngiang .
Na ka liang pyrshah jong ka iing dorbar ym shym la don MLA ban wan sha kane ka jingsmai jong u Lat ka jylla, U Ba la poi sha kane ka jingpynsmai na ka liang ka seng Congress u Bah Vincent H Pala MP jong ka 1-Shillong Parliamentary Konstitwensi. Ha kane ka sngi la don ruh ki heh sorkar bad kum juh ki heh na ki kynhun shipai bapher bapher kiba don ha kane ka nongbah Shillong.
